Dinagadag ni Presidente Ferdinand Marcos Jr. ti Philippine National Police (PNP) a papigsaenda ti internal reforms tapno mapapardas ti panagtignay kadagiti pangta iti seguridad, ken tapno masigurado ti kaadda dagiti polis iti kalsada, bayat ti panangdutokna ken ni Police General Nicolas Torre III a kas baro a hepe ti 230,000 ti kamengna a PNP.
Iti naangay a seremonia iti Camp Crame iti Siudad ti Quezon ita nga aldaw, Hunio 2, nalawag ti bilin ti presidente iti baro a daulo ti PNP a dalusanda ti polisia, pardasanda ti pannakaimbestigar kadagiti panangabuso dagiti polis, ken manayonan ti polis kadagiti kalsada tapno masigurado ti kinatalged ti publiko ken maisubli ti panagtalek ti publiko.
"Ipariknatayo kadagiti Filipino nga adda polis a sisasagana a mangisakit ken mangsalaknib kadakuada iti ania man nga oras, kinuna ni Marcos.
Binilinna met ni Torre nga itultuloyna anti-illegal drug operation ti gobierno, ket nagballaag ti presidente nga agpada a madusa dagiti nangangato a drug lord ken dagiti aglaklako iti droga iti kalsada.
₱15-billion nga EDSA rehab project, saan a nakanselar --Sek. Dizon
Innayon ti presidente a makikoordinar ti PNP iti Philippine Drug Enforcement Agency (PDEA) ket agtultuloy ti panangsiimda kadagiti maapektaran a komunidad.
Ni Torre ti dinutokan ni Marcos a sukat ni Police General Rommel Francisco Marbil a nakagtengen iti mandatory retirement age a 56. (Argyll Cyrus Geducos/Manila Bulletin//Lito Hilidon/Bannawag)
