Nagkumit ni kaddutok a hepe ti Philippine National Police (PNP) General Nicolas Torre III nga ipakatna ti "three-minute police response" iti Metro Mainla ken dadduma pay nga urban area iti pagilian kas paset ti baro nga estratehia tapno marikna ti komunidad ti kaadda dagiti polis.
Sakbay daytoy, imbilin ni Presidente Marcos Jr. iti puersa ti polisia a mangisaadda iti ad-adu pay a polis tapno adda makita a polis iti komunidad, ket iti biang ni Torre, ti three-minute police response ti sungbat iti dayta.
Iti panagbitla ni Torre iti naangay a turn over ceremony iti Camp Crame, Siudad ti Quezon ita nga aldaw, Hunio 2, kinunana nga ipakatna ti three-minute emergency response time kadagiti kangrunaan a siudad.
Kinuna ni Torre a saanen a baro daytoy a wagas ta impakatna daytoy idi nagpaay a daulo ti polis iti Quezon City, ket ti panagballigi daytoy a programa ti pammaneknek a saan nga imposible nga aramiden ti napartak a panagresponde ti polis.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Inlawlawag ni Torre a maipakat daytoy kadagiti urban area idinto a sabali ti kasasaad ti tattao kadagiti rural area, ta maturogdan iti 7:00 wenno 8:00 iti rabii, isu a maiduma met ti response time kadagitoy a lugar.
Nupay dakkel ti namnamaen ni Torre nga aramiden dagiti polis, inkarina a maikkan iti kasayataan a panagsanay, kasayaatan a panangidaulo, ken kasayaatan a gundaway iti panagdur-as dagiti polis. (Aaron Recuenco/Manila Bulletin//Lito Hilidon/Bannawag)
