Inlawlawag ni Department of Transportation (DOTr) Secretary Vince Dizon ita a Martes, Hunio 3, a naitantan laeng ti rehabilitasion ti Epifanio De Los Santos Avenue (EDSA) ken saan a technically cancelled.
Ingganetget daytoy ni Dizon bayat ti hearing ti ad interim appointment-na iti sanguanan ti Commission on Appointments (CA) Committee on Transportation.
Sinungbatan ni Dizon ti saludsod ni Surigao del Sur Rep. Johnny Pimentel mainaig iti direktiba ni Presidente Marcos Jr. para iti makabulan a pannakaitantan ti rehabilitasion ti EDSA.
"Saan a kayatna a sawen a nakanselar. Ngem kinuna ti Presidente a dimngeg kadagiti kailiantayo tapno makabiroktayo iti nasaysayaat ken naparpardas a wagas (tapno malpas ti rehabilitasion)," kinuna ni Dizon.
₱200 a nayon ti sueldo, tingitingen pay dagiti senador
Segun ken ni Dizon, kayat ni Marcos a mapadaras ti pannakatarimaan ti kangrunaan a kalsada manipud iti dua a tawen iti innem a bulan.
"Kayatna a maaramid iti wagas a saan unay a mangpataud iti parikut kadagiti kailiantayo a dumaldalan iti EDSA," kinunana.
Idi napagsaludsodan no mano ti dagup a gatad ti proyekto, kinuna ni Dizon a pattapattaen ti Department of Public Works and Highways (DPWH) a dumanon iti ₱8.7-bilion ti pannakatarimaan inton 2026, ngem dumanon iti ₱15-bilion ti gatad agingga iti pannakaileppasna inton 2027.
Kinuna pay ni Dizon a ti sakup ti rehabilitasion a maaramid koma iti EDSA ketpakairamanan ti rekonstruksion ti tunggal lane, ken middle lane, pannakabalbaliw ti konkreto nga estruktura ken pannakaaspaltona.
Ti rekonstruksion ti EDSA ket pakairamanan pay ti pannakatarimaan ti drainage ken dagiti bangketa, innayon ni Dizon. (Hannah L. Torregoza/MB)
