Insingasing ti Department of Health (DOH) ti pannakaideklarar ti human immunodeficiency virus (HIV) a kas national public health emergency gapu iti 500-porsiento a panagngato ti bilang dagiti kaso kadagiti agtutubo iti pagilian.
Iti maysa a video message ita a Martes, Hunio 3, kinuna ni DOH Secretary Teodoro Herbosa a nairekord ti dakkel a panagngato kadagiti agtawen iti 15 agingga iti 25.
"Ti kaubingan a nadayagnos a kaso ket maysa nga agtawen ti 12 iti probinsia ti Palawan," kinunana.
Nupay saanna a dinakamat ti espesipiko a bilang mainaig iti HIV infection kadagiti agtutubo, kinuna ni Herbosa a ti Filipinas ti kaaduan itan iti bilang dagiti baro a kaso ti HIV iti Western Pacific Region.
₱200 a nayon ti sueldo, tingitingen pay dagiti senador
Segun iti kaudian a HIV/AIDS Surveillance Report, adda 148,831 a kaso ti HIV a nairekord iti entero a pagilian manipud 1984 agingga iti Marso ita a tawen.
Agdagup iti 5,101 a kaso ti nailista bayat ti umuna a kuarter daytoy a tawen, nangatngato ngem iti 3,409 a nairekord bayat ti isu met laeng a panawen idi napan a tawen.
Kabayatanna, 57 a kaso ti HIV ti average a mairep-report iti inaldaw, a nangatngato ngem iti 37 a nairekord idi napan a tawen.
"No saantayo a malapdan ti panagadu ti kaso ti HIV, mabalin a madanontayo ti nasurok a 400,000 a tattao nga agbibiag nga addaan iti HIV," kinuna ni Herbosa.
Ingganetget ti hepe ti DOH a kasapulan ti national public health emergency declaration ti whole-of-government approach iti pannakataming ti parikut.
Maibatay iti datos ti DOH, ti seksual a pannakikontak ti agtaltalinaed a kangrunaan a wagas ti pannakayakar ti HIV, a naammuan a kaaduan kadagiti lallaki a makiseks kadagiti lallaki, manipud idi 2007.
Tapno maliklikan ti impeksion, ibalbalakad ti DOH ti panagsanay iti combination prevention method wenno panagusar iti kondom ken lubricants bayat ti pannakiseks ken pre-exposure prophylaxis.
Maibalakad met dagiti maseknan nga indibidual nga agpaeksamenda iti libre ken kompidensial nga HIV test nga ididiaya ti gobierno.
Maidagadag kadagiti nagpositibo nga agpakonsulta iti mangngagas para iti maitutop nga antiretroviral therapy.
Mangididiaya met ti Philippine Health Insurance Corporation (PhilHealth) iti enhanced Outpatient HIV Treatment Package para kadagiti indibidual nga addaan iti HIV/AIDS. Addaan daytoy iti tinawen a benepisio a ₱58,500 pakairamanan ti antiretroviral therapy para kadagiti nakompirmaren a nagpositibo iti HIV test. (Teresa Montemayor/PNA)
