Dinayaw ni Senate President Francis “Chiz” Escudero ti desision ni Presidente Ferdinand Marcos Jr. a nangdutok ken ni Gen. Nicolas Torre III a kas baro a hepe ti Philippine National Police (PNP), ket kinunana a maitunos daytoy iti linteg a masapul a ti liderato ti PNP ket sibilian.
Ni Torre, a kameng ti PNPA “Tagapaglunsad Class” ti 1993, ti maika-31 a hepe ti PNP a nangsukat ken ni Gen. Rommel Francisco Marbil, a kameng ti Philippine Military Academy (PMA).
Sakbay ti pannakadutok ni Torre, amin a nagbalin a hepe ti PNP ket nagturpos iti PMA, agraman dagiti dati a hepe ti PNP ken senador itan a da Ronald “Bato” Dela Rosa ken Panfilo “Ping” Lacson.
Segun ken ni Escudero, ni Torre ti kaunaan a nagturpos ti PNPA nga agbalin a kas hepe ti PNP iti historia ti pagilian, ket ti pannakadutokna ti pakatungpalan ti 35 ti tawennan a linteg.
₱200 a nayon ti sueldo, tingitingen pay dagiti senador
Dinakamat ni Escudero ti Republic Act 6975 wenno ti Department of Interior and Local Government Act of 1990, a nangbuangay iti PNP ken DILG, nga agkunkuna a ti PNP ket masapul a buklen dagiti kameng ti polisia a naitipon iti Integrated National Police (INP) ken dagiti opisial ken enlisted personnel ti Philippine Constabulary (PC), a nagbalin a PC-INP idi agangay.
Kinuna ni Escudero a gapu ta intuding ti linteg a ti PNP, kas maysa a puersa ti polis, ket sibilian ti kababalinda, dakkel a karit ken ni Torre ti paneknekanna nga umisu laeng a ti puersa ti polis ket agtignay a kas maysa a sibilian, saan a kas iti militar a kababalin. (Hannah L. Torregoza/Manila Bulletin//Lito Hilidon/Bannawag)
