Kabuteng aya ni Senate President Francis "Chiz" Escudero ni Bise Presidente Sara Duterte?
Daytoy ti saludsod ni Akbayan Party-list Rep. Perci Cendaña ita nga aldaw, Hunio 3, kas panangbabalawna iti daulo ti Senado gapu iti agtultuloy a pannakaitantan ti impeachment trial kontra ken ni Duterte.
"Tunggal aldaw a pannakaitantanna, mangiparipirip nga agbuteng ti liderato ti Senado ken ni VP Duterte, wenno, salsalaknibanna daytoy," kinuna ni Cendaña.
Ni Cendaña, a nangyendorso iti umuna nga impeachment complaint a naipila iti maika-19 a Kongreso maibusor ken ni Duterte, ket saan a nga umanamong iti panangilaksid ni Escudero iti proseso ti impeachment, nga ibilangna daytoy a kasla 'tay uso nga aglabasto met laeng.
₱200 a nayon ti sueldo, tingitingen pay dagiti senador
Dinakamat ni Cendaña ti kaudian a surbey ti Social Weather Stations (SWS) a dandani 9 kadagiti 10 a Filipino, kayatda a sungbatan ni Duterte dagiti kasona iti impeachment ken dalusanna ti naganna kadagiti pammabasol a panagkunniber.
Segun iti surbey, 68 a porsiento dagiti Filipino ket patienda a masapul a sanguen ni Duterte dagiti kasona, idinto a 7 a porsiento laeng ti nagkuna a liklikanna amin nga isyu mainaig kenkuana.
Kinuna ni Cendaña a kayat ti publiko a maaramid ti impeachment trial.
Sinupiat pay ni Cendaña ti kinuna ni Escudero a saan a mayallatiw ti impeachment complaint iti maika-20 a Kongreso, ket kinunana nga awan ti legal a pagibasaran daytoy iti Konstitusion, jurisprudence, wenno iti paglintegan ti Senado. (Ellson Quismorio/Manila Bulletin//Lito Hilidon/Bannawag)
