Inaprobaran ni Presidente Marcos Jr. ti pannakaipasdek ti Philippines-European Union (EU) Security and Defense Dialogue a naisayangkat bayat ti isasarungkar ti EU High Representative for Foreign Affairs and Security Policy ken Vice President of the European Commission (HRVP) a ni Kaja Kallas.
Nag-courtesy call ni Kallas iti presidente idi Hunio 2 iti Malakanyang, a nangyebkasan ni Marcos iti panagyamanna iti EU gapu iti agtultuloy a panangtulongna iti Filipinas.
Ti panagsarita, a naikeddeng a mangrugi iti arinunos daytoy a tawen, ket inwaragawag da Kallas ken ni Sekretario ti Department of Foreign Affairs (DFA) Enrique Manalo idi Hunio 2.
Nataming iti panagsaritada dagiti agdama a geopolitikal a parikut ken mangpataud iti panagbinninglay ken panagtinnulong iti benneg ti seguridad ken depensa, agraman ti kinatalged iti baybay, cybersecurity, nagduduma a pangta, ken foreign information manipulation and interference (FIMI).
Impaganetget dagiti dua nga opisial ti pagimbagan ti agtultuloy a kooperasion kadagiti nadumaduma a gandat kas iti Critical Maritime Routes Indo-Pacific (CRIMARIO II), Copernicus, ken Enhancing Security Cooperation in and with Asia (ESIWA Plus).
Pannakaimbestigar ti napasamak iti Senado, imbilin ni Presidente Marcos
Pinasingkedanda ti panagkumitda iti pananagsalimetmet iti sangalubongan a linteg, partikular ti 1982 UN Convention on the Law of the Sea (UNCLOS) ken ti 2016 South China Sea Arbitration Award, a nagun-od ti Filipinas.
Segun iti DFA, ti isasarungkar ni Kallas ti mangipasimudaag iti progreso iti panangpatibker iti relasion ti Filipinas ken ti European Union. (Raymund Antonio/Manila Bulletin//Lito Hilidon/Bannawag)
