Iprosproseso dagiti crime investigator ti crime scene a nakapaltogan ken nakapapatayan ni dati a Lagayan, Abra Mayor Jenricks Luna idi agsapa ti Martes, Hunio 3, 2025. Kinuna ti Police Regional Office-Cordillera information unit nga agtultuloy ti manhunt kadagiti nangpaltog iti biktima. (Ladawan manipud PROCAR-PIO)

Madaman a sapsapulen dagiti pannakabagi ti linteg ti uppat a tattao a responsable iti pannakapaltog ken pannakapapatay ti dati a mayor ti ili ti Lagayan, Abra idi agsapa ti Martes, Hunio 3.

Kinuna ni Col. Carolina Lacuata, information officer ti Police Regional Office-Cordillera Administrative Region (PROCAR), a segun iti report manipud iti Abra Police Provincial Office, nakatugaw ni Jenricks Seares Luna, 54, iti maysa a kiosko iti sango ti balayda iti Barangay Dangdangla, iti ili ti Bangued, iti agarup alas otso ti bigat idi pinaltogan ti uppat a tao a nakalugan iti dua a motorsiklo.

"Naitaray ti biktima iti Seares Memorial Hospital babaen kadagiti kakabagianna ngem indeklarar ti attending physician a natayen daytoy," kinuna ni Lacuata.

Naammuan iti inisial nga imbestigasion a napaltogan ti biktima iti namin-adu a daras, sa kalpasanna, naglibas dagiti suspek nga agturong iti di ammo a direksion.

Lokal

10-ektaria a plantasion ti kawayan a Beema, maisagsagana iti Ilocos Norte

"Naalerton dagiti Municipal Police Stations, Mobile Forces, ken intelligence operatives a mangisayangkat ti dragnet operation para iti posible a pannakakemmeg dagiti suspek," kinuna ni Lacuata.

"Addan dagiti polismi a mangpa-follow up iti insidente," kinunana.

Itay agtengnga ti aldaw, narekober dagiti polis ti dua a napanawan a motorsiklo iti Barangay Cosili, Bangued, ngem saan pay a naammuan no dagitoy ti inaramat dagiti suspek.

Nagserbi ni Luna kas mayor ti Lagayan manipud 2016 agingga 2019.

Iti nabiit pay a nasional ken lokal nga eleksion, nagkandidato iti kinabokal ti District 1 ti probinsia ngem naabak. (Liza Agoot/PNA)