Inaprobaran ti Senado idi Hunio 2 ti linteg a mangipaay iti libre a serbisio ti puneraria kadagiti nakurapay a pamilia nga agkasapulan unay ken adda pakarigatanda.
Inisponsoran ni Senadora Imee Marcos ti Senate Bill (SB) No. 2965, wenno ti Free Funeral Services Act.
Segun iti linteg, maibilang a nakurapay dagiti pamilia nga adda iti baba ti poverty threshold ti sapulda, kas inkeddeng ti National Economic and Development Authority (NEDA) ken/wenno dagiti dida kabaelan nga ipaay dagiti kangrunaan a kasapulan a taraon, salun-at, edukasion, pagbalayan, wenno dadduma pay a kasapulan nga alikamen ti biag kas inkeddeng ti Republic Act No. 8425, wenno ti Social Reform and Poverty Alleviation Act.
Libre a serbisio ti puneraria ti maipaay kadagiti pamilia nga adda pakarigatanda, kas inkeddeng ti Department of Social Welfare and Development (DSWD), agraman ngem saan nga agpatingga kadagiti marigrigat a pamilia, wenno dagiti naapektaran ti kalamidad, didigra, wenno dadduma pay nga emerhensia a nangtungday iti kabaelanda a mangipaay iti nadayaw a serbisio ti puneraria.
Maikkan dagiti kualipikado a pamilia iti “Indigent Funeral Package” a pakairamanan ti pannakaisagana ti dokumento ti ipapatay, pannakabalsamar, pannakaitabon, pannakaibiahe, cremation ken pannakaikabil ti dapo iti urn; agraman ti pannakaipaay iti lungon, urn, wenno pakaitabonan, segun iti kasapulan, nga idiaya dagiti kompania ti puneraria.
TRO kontra iti proseso ti Kamara iti impeachment ni VP Duterte, kiniddaw dagiti abogado
Dagitoy dagiti kasapulan a maiparang tapno makaala iti indigent funeral package: (1) balido nga identification card ti agkiddaw wenno benepisiario; (2) death certificate manipud iti ospital, wenno city/municipal health office, wenno manipud iti tribal chieftain; (3) kontrata iti puneraria a pinirmaan ti pannakabagi wenno pamilia ti pimmusay, ti kompania ti puneraria, ken ti empleado ti DSWD; ken (4) social case study nga insagana ti rehistrado a social worker. (Dhel Nazario/Manila Bulletin//Lito Hilidon/Bannawag)
