Not guilty ti indatag ni direktor ti pelikula Darryl Yap a sungbatna iti korte ti Siudad ti Muntinlupa ita nga aldaw, Hunio 3, mainaig iti dua a kaso ti cyberlibel nga impila ni Vic Sotto maigapu iti teaser ti kontrobersial a pelikula a "The Rapists of Pepsi Paloma."
Naangay ti arraignment ni Yap iti Muntinlupa Regional Trial Court Branch 203, nga akin-iggem iti kaso a libel mainaig iti Cybercrime Prevention Act of 2012.
Saan a dimmar-ay ni Sotto iti arraignment.
Naikeddeng ti umuna a bista inton Agosto 19.
₱200 a nayon ti sueldo, tingitingen pay dagiti senador
Ngem sakbay a mapan ti korte iti panangbista, kinuna dagiti abogado ti agsinnumbangir a partido a masapul nga agdalanda iti mandatory mediation conference.
Segun iti abogado ni Yap a ni Raymond Fortun, kankanayon a silulukat ni Yap para iti pannakiareglo wenno amicable settlement.
Ngem kinuna ni Enrique Dela Cruz Jr., abogado ni Sotto, a dina pay nakasarita ti klientena maipapan iti amicable settlement. (Jonathan Hicap/Manila Bulletin//Lito Hilidon/Bannawag)
