Isagsaganan ti gobierno probinsial ti Ilocos Norte ti 10 nga ektaria a plantasion a mamulaan iti kawayan a Beema iti Barangay Camandingan iti Siudad ti Batac, nga addaan iti umuna a batch ti 10,000 a propagules (patubo) a nakasaganan a maimula ita a panawen ti panagtutudo.
"Nakasaganan ti lugar a mamulaan. Ur-urayenmi laeng ti pannakaited dagiti propagules tapno rugianmin ti panagmula ita a bulan wenno iti umuna a lawas ti Hulio," kinuna ni Hashler Garalde, bamboo focal person ti gobierno ti Ilocos Norte idi Martes, Hunio 2.
Kinuna ni Garalde a ti kawayan a Beema ket maysa a superior clone a napili manipud iti Bambusa balcooa, maysa a higher biomass-yielding species a naggapu iti India.
Ti kawayan a Beema ti maysa met kadagiti kapardasan a dumakkel a mula, nga umatiddog iti average a maysa ket kagudua a kadapan iti kada aldaw iti tropikal a kasasaad.
Pimmaltog iti dati a mayor iti Abra, sapsapulenen ti PNP
Segun dagiti eksperto iti kawayan, napintas ti Beema a pilien a mangpaberde iti aglawlaw ken para iti climate change. Adu pay ti pakausaranna, kas iti panagbangon kadagiti pasdek, produksion ti pulp ti papel, energy power generation, produksion ti uring, ken panagaramid kadagiti muebles ken nadumaduma nga aramid a handicraft.
Ti proyekto a panagmula ket paset ti programa ti gobierno probinsial a Sustainable Agroforestry Farm Enterprise-Bamboo Business Model (SAFE-BBM) a naisayangakat babaen ti pannakitinnulong ti Departament of Agriculture, City Government of Batac, Bureau of Fisheries and Aquatic Resources (BFAR), ken Nueva Segovia Consortium of Cooperatives.
Panggep ti programa a pasayaaten dagiti oportunidad ti pagbiagan, mapatibker ti climate resiliency, ken maitandudo ti ecological conservation kadagiti target a komunidad iti Ilocos Norte.
Iti panangsuportarda iti programa ti SAFE-BBM, nagtutunos nga inaprobaran dagiti kameng ti Sangguniang Panlalawigan idi Hunio 2 ti Provincial Resolution No. 2025-05-452 a mangted iti autorisasion ken ni Gobernador Matthew Joseph Manotoc a makitulag iti maysa a memorandum of understanding kadagiti dadduma a maseknan a partido para iti pannakaipatungpal ti proyekto. (Leilanie Adriano/PNA)
