Agwarwaras iti Senado ti draft ti resolusion nga agkidkiddaw iti de facto dismissal ti kaso nga impeachment kontra ken ni Bise Presidente Sara Duterte.
Kinompirmar ni kabbotos a Senador Panfilo “Ping” Lacson nga adda naawatna a kopia ti dokumento nga awan petsana, awan numerona, ken awan autorna, ngem patienna nga adu ti nasken a paglasatan ti resolusion sakbay a maannurot ti tarigagay ti resolusion, idinto a mabalin pay a balusingsingen ti Korte Suprema daytoy.
Tarigagayan ti resolusion ti pannakawaswas ti impeachment complaint maibusor iti maikadua a kangatuan nga opisial ti pagilian, gapu ta nasuroken a 100 nga aldaw sipud idi nayawat ti Articles of Impeachment iti Senado nga awan ti aksionda.
Iti isu met laeng a resolusion, kinunana a maiparit iti pagalagadan ti Senado a mayallatiw ti impeachment trial iti maika-20 a Kongreso.
₱200 a nayon ti sueldo, tingitingen pay dagiti senador
Inlawlawag ni Lacson nga uray mapirmaan ti mayoria dagiti Senador ti resolusion, masapul a maadaptar nga umuna daytoy iti plenario; ket uray maanamongan iti Senado, saan latta pay a pinal daytoy, ta mabalin a makuestionar iti Korte Suprema, ket no maanamongan, piliten ti Korte Suprema nga ag-convene ti Senado kas impeachment court.
Kinuna ni Sen. Joseph Victor “JV” Ejercito a saanna pay a nakita ti dokumento, ngem impaganetgetna nga annongen ti Senado ti agbalin nga impeachment court kas sagudayen ti Konstitusion.
Iti biang ni Senate Minority Leader Aquilino “Koko” Pimentel III, kinunana nga adda biddut iti lohika ti dokumento, ket dakkel ti posibilidad a saan a pudno daytoy. (Hannah L. Torregoza/Manila Bulletin//Lito Hilidon/Bannawag)
