Mabalinton a kitaen ken tamingen dagiti motorista dagiti panaglabsingda iti trapiko babaen ti eGov PH super app ti gobierno no maitiponen ti Department of Information and Communications Technology (DICT) no contact apprehension policy (NCAP) system iti nasao nga app.
Inwaragawag daytoy ni DICT Undersecretary David Almirol Jr. kabayatan ti press briefing iti Malakanyang ita nga aldaw, Hunio 4, kalpasan ti pannakimitingda iti Metropolitan Manila Development Authority (MMDA).
"Inton malpas ti integration, mayat daytoy ta makitayonton dagiti violation-yo. Uray no addakayo iti balayyo, mabalinyo nga i-settle dagiti penalty," kinuna ni Almirol.
Palubosan ti NCAP ti MMDA a mangirekord, mangrepaso, ken mang-validate kadagiti panaglabsing iti trapiko babaen kadagiti CCTV camera.
₱200 a nayon ti sueldo, tingitingen pay dagiti senador
Maipatpatungpal daytoy kadagiti kangrunaan a kalsada iti Metro Manila kas iti EDSA, Commonwealth Avenue, Quezon Avenue, Roxas Boulevard, ken Taft Avenue.
Paset ti integration ti nalawlawa a panangiganetget ti DICT a mangipaay iti ad-adu pay a serbisio ti gobierno iti maymaysa a digital platform wenno app.
Kinuna ni Almirol a dandani 1,000 a sistema ti gobierno ti naikonektaren iti eGov PH app.
Karaman ditoy dagiti serbisio a mainaig iti digital identification, turismo, panagbiahe, ken dagiti benepisio manipud kadagiti ahensia a kas iti Philippine Health Insurance Corporation (PhilHealth) ken Government Service Insurance System (GSIS).
Igangganetget met ni Presidente Ferdinand Marcos Jr. ti pannakapasayaat ti serbisio publiko babaen ti digital transformation. (Darryl John Esguerra/PNA)
