Indagadag ti Senado iti Philippine Health Insurance Corporation (PhilHealth) idi Hunio 3 a nayonanda koma ti coverage-da para kadagiti bakuna ti anti-rabies, iti baet ti report ti Department of Health (DOH) nga umad-adu ti kaso ti rabies iti pagilian.
Iti naangay a Senate Committee on Health and Demography hearing, indatag ni Senador Raffy Tulfo ti parikut iti agkurkurang a tulong ti PhilHealth kadagiti Animal Bite Centers iti entero a pagilian. Segun ken Tulfo, ₱5,000 aginga ₱6,000 laeng ti agdama a coverage ti PhilHealth, adayo a nababbaba ngem iti pudpudno a gatad ti panangagas a mapan a ₱20,000.
"Adda pay ₱15,000 nga utang ti pasiente. Ania ti aramidenna? Mapan agpatulong kadagiti politiko," kinuna ni Tulfo.
Insingasing ni Tulfo a nayonan laengen ti PhilHealth ti coverage-da manipud ₱5,000 ket agbalin koma a ₱15,000.
₱200 a nayon ti sueldo, tingitingen pay dagiti senador
Adda 866 nga accredited Animal Bite Centers ti PhilHealth iti entero a pagilian.
Dinakamat ni Senador Christopher "Bong" Go, daulo ti Senate Committee on Health, ti datos ti DOH nga adda 55 a kaso ti rabies manipud Enero agingga iti Marso 2024. Idi 2024, agdagup iti 426 ti natay gapu iti rabies.
Impaganetget ni Go a ti kinangina ti bakuna ti makaigapu nga agkedked ti publiko a mapan agpaagas.
Kinuna pay ni Tulfo nga adda pondo dagiti LGU, a mangipapaay iti libre a bakuna kontra iti rabies kadagiti dinguen wenno kadagiti walang nga aso. (Dhel Nazario/Manila Bulletin//Lito Hilidon/Bannawag)
