Ammoyo kadi no apay a dagiti dadduma a polis ket maturog a bayat a naka-duty? Kapilitan ngamin nga agtrabahoda iti 12 nga oras.
Iti biang ni baro a hepe ti Philippine National Police (PNP) Gen. Nicolas Torre III, nalabes daytoy ket masapul a mataming kas inkarina nga ipatungpalna ti walo nga oras a panagtrabaho dagiti polis iti tunggal aldaw iti entero a pagilian.
Segun ken ni Torre, tao laeng met, ken saan a makina dagiti polis.
Iti agdama, dagiti dadduma a polis ket masapul nga ag-duty iti las-ud ti 12 nga oras tunggal aldaw wenno 72 nga oras kada lawas, ket kinuna ni Torre a maisupiat daytoy iti labor code ta 40 nga oras laeng iti tunggal aldaw ti ipalubos ti linteg.
₱200 a nayon ti sueldo, tingitingen pay dagiti senador
Kinuna ni Torre a mangaramid iti sistema a mangkissay iti oras ti panagtrabaho dagiti polis, ngem kasukat daytoy ti nasaysayaat a kalidad ti trabaho. Kaipapananna a masapul nga ipamaysa ti tunggal polis ti trabahona ken iti panangtungpalna iti annongen ti maysa a kameng ti PNP.
Innayon ni Torre a no kalpasan ti pannakaipatungpal daytoy, adda pay la matiliwan a polis a matmaturog iti oras ti trabaho, nangruna iti Metro Manila, maikkat a dagus iti serbisio. (Aaron Recuenco/Manila Bulletin//Lito Hilidon/Bannawag)
