Impeksa dagiti senador ita a Huebes, Hunio 5, ti panagannad iti pananganamong ti Kamara iti ₱200 a daily minimum wage hike, nga intudoda dagiti mabalin a pakarisguan dagiti babassit a negosio ken posible a panang-veto ti Malakanyang.
Imballaag ni Senador Joseph Victor Ejercito a nupay mabalin a nasayaat para iti politika ti panagngato ti sueldo, mabalin a saan a nasayaat ti resultana daytoy kadagiti marigrigatan a negosio no saan a naannad a matimbeng.
“Masapul a siguraduentayo met a ti negosio ket makalasat ken saan a matay daytoy. Amangan met no makapadagsen daytoy para iti dadduma nangruna kadagiti babassit ken medium scale a negosio),” kinunana iti Senate Forum.
“Adda pagsasao a ‘saantayo a patayen ti ganso nga agit-itlog iti balitok.' Kasla koma ipaaytayo no ania ti napintas iti politika ngem baka met no patpatayentayon ti negosio, Kasapulantayo met a balansien, nga agpada manipud kadagiti empleado ken sektor ti negosio ken kasta met kadagiti economic managers no ania ti kabaelanda," innayonna.
SEC, nangiruar iti AI chatbot a mangsungbat kadagiti saludsod ti publiko
Pinadayawan met ni Senador Juan Miguel Zubiri, autor ti bersion ti Senado a ₱100 laeng ti pakaingatuan ti sueldo, ti panangipasa ti Kamara ngem indagadagna ti madagdagus a koordinasion.
“No kayatda laeng nga anamongan, ket kasta koma ngarud. Adaptarentayo. Ngem no planoda ti mangisayangkat iti sumagmamano nga amendment, idagadagko met kadagiti kakaduak iti Senado ken iti Presidente ti Senado a mangangay iti bicam (miting ti Bicameral Committee) iti kabiitan a panawen tapno mataming pay daytoy iti sumaruno a tallo nga aldaw sakbay nga agleppastayo (maika-19 a Kongreso),” kinuna ni Zubiri iti maysa a waragawag.
Nupay kasta, namakdaar met ni Senador Joel Villanueva a ti basta lattan panangadaptar iti bersion ti Kamara, mabalin a makapadakes, a dinakamatna a ti bersion ti Senado ket mangisingsingasing iti ₱100 laengo, isu a kasapulan a pagsasaritaan daytoy iti bicameral.
“Kaasi met ti Pangulo. Kas man bin-ig laengen a parikut ti it-itedtayo kenkuana ket kas man ti panagkitatayo no mapasamak man dayta, agdiretso a ma-veto laeng,” innayonna. (Wilnard Bacelonia/PNA)
