Asidegen ti makuna a historikal a pannakaipaulog ti paglintegan a ₱200 a pannakaipangato iti minimum wage kalpasan a maanamongan daytoy iti maikatlo ken maudi a pannakaibasana iti Kamara idi Hunio 4.
Immanamong dagiti 172 a kongresman iti House Bill (HB) No.11376 wenno ti "Wage Hike for Minimum Wage Workers Act." Awan ti nangsupiat, idinto nga adda maysa a nag-abstain.
Naragsak ni Deputy Speaker Diputado Raymond Democrito Mendoza (TUCP Party-list) a nangidaulo iti sesion, ken nangideklarar iti pannakaipaulog ti linteg iti maikatlo a pannakaibasa.
Idi Pebrero 3, naaprobaran iti maikadua a pannakaibasa ti gakat a ₱200 wage hike a mangsakup kadagiti mangmangged iti pribado a sektor.
Pimmatay iti 2 a polis iti Bulacan, natay a nakipinnaltog iti Cagayan
Maibatay iti linteg, manayonan iti ₱200 ti inaldaw a matgedan dagiti amin a minimum wage worker iti pribado a sektor uray ania man ti estado ti trabahoda, agraman dagiti contractual ken sub-contractual, iti sektor ti agrikultura man wenno saan.
Mailaksid iti linteg dagiti Barangay Micro Business Enterprises (BMBE).
Tapno matulongan dagiti mangannurot iti linteg, igunamgunam ti HB No.11376 nga adda gunggona a maala dagiti babassit a negosio manipud iti Department of Labor and Employment (DOLE) kas maitunos iti implementing rules and regulations (IRR).
Tawen 1989 idi naudi a naipaulog ti pannakaipangato ti matgedan babaen ti Kongreso.
Apagtapog ti 2025, dinagadag ni House Speaker Ferdinand Martin Romualdez dagiti kakaduana iti Kamara a pardasanda ti pannakaipasa ti HB No.11376- kas insingasing ni Presidente Marcos.
Iti biang ti Senado, naaprobaranen iti maikatlo a pannakaibasa idi Pebrero 19, 2024 ti Senate Bill (SB) No. 2534 a mangilunglungalong iti ₱100 a nayon iti inaldaw a sueldo dagiti mangmangged.
Mapagtunos dagiti dua a paglintegan iti hearing ti Bicameral Conference Committee a dar-ayan dagiti kameng ti Kamara ken Senado. (Ellson Quismorio/Manila Bulletin//Lito Hilidon/Bannawag)
