Inaprobaran ti Kamara, iti maikatlo ken maudi a pannakaibasa, ti gakat a mangipasdek iti programa ti Department of Social Welfare and Development (DSWD) nga Assistance to Individuals in Crisis Situations (AICS) a kas maysa nga institusion.
Inanamongan dagiti 176 a diputado ti House Bill (HB) No.11395 iti plenario idi Hunio 4, iti laksid dagiti pammabalaw a maus-usar ti AICS iti politika.
Ngem impinget dagiti nangitandudo iti linteg a maysa daytoy a wagas ti panangtulong ti gobierno kadagiti Filipino nga agkasapulan.
Idi 2023, 6.5 a milion a Filipino ti naikkan iti aggatad iti ₱40.9 a bilion a tulong babaen ti AICS.
₱200 a nayon ti sueldo, tingitingen pay dagiti senador
Panggep ti HB No.11395 nga ipasdek ti AICS a kas programa ti DSWD nga addaan ti pinansial ken administratibo a kabaelan a mangipaay iti kasapulan dagiti Filipino nga adda iti narigat a kasasaad.
Babaen daytoy, tunggal kualipikado a benepisiario ket maikkan iti tulong a pinansial, medisina, transportasion, taraon, ken dadduma pay a kita ti tulong a maited ti DSWD.
Imandar ti HB No.11395 iti ania man a public wenno private entity a mangipaay iti serbisio iti sidong ti AICS program nga awatenda dagiti guarantee letter, coupon, check wenno voucher nga iruar ti DSWD kas bayad iti obligasion ti kualipikado a benepisiario. (Ellson Quismorio/Manila Bulletin//Lito Hilidon/Bannawag)
