Addan aganay a 375,718 a residente iti Ilocos Region ti nangi-download ken agus-usaren iti eGovPH mobile app para iti streamlined access iti serbisio ti gobierno nasional ken lokal, kinuna ti maysa nga opisial ti Department of Information and Communications Technology (DICT) idi Hunio 4.
Sipud idi Mayo 25 ita a tawen, agarup 216,000 a downloads ti nairekord iti Pangasinan, 65,000 iti La Union, 51,000 iti Ilocos Sur, ken 42,000 iti Ilocos Norte, kinuna ni direktor ti DICT Ilocos Region June Vincent Manuel Gaudan, iti forum nga indauluan ti Philippine Information Agency Ilocos Region.
Segun ken Gaudan, addaanen ti app iti 34 nga integrated services, 6 a linked websites, ken 13 a madama nga integration of services manipud idi nairuar daytoy idi 2023 tapno agserbi a kas maymaysa nga operating system para kadagiti amin a serbisio ti gobierno ti Filipinas iti maymaysa nga aplikasion (app).
Agserbi ti mobile app kas one-stop-shop platform a mangipaay iti nam-ay iti publiko ken mangpasayaat kadagiti transaksion, kinuna ni Gaudan.
Kasapulan ti natibker ken nainkalintegan a pagtaktakderan iti parikut iti WPS --NMC
“Nakalaklaka nga usaren ken best rated government application nga addaan iti 4.8 rating out of 5,” kinunana pay.
Dagiti kabarbaro a serbisio iti app ket pakairamanan ti pannaka-update ti senior citizen identification (ID) card, pannakaurnos dagiti serbisio ti panagbiahe wenno pannakapataud ti eTravel, ken ti online access kadagiti lisensia kas iti driver’s license ken dagiti lisensia manipud iti Professional Regulatory Commission.
Amin a nakarehistro iti app, automatiko a maaddaan iti senior citizen ID apaman madanonda ti edad a 60 agsipud ta nakakonektaren ti eGovPH app iti national identification system, kinuna pay ni Gaudan.
Mabalin payen nga aksesen dagiti agbibiahe iti dadduma a pagilian ti eTravel babaen ti app.
“Igunamgunamko iti amin nga i-download-da iti eGovPH app,” kinuna ni Gaudan, innayonna a ti digital transformation ket nairanta a mangpalag-an iti biag dagiti tattao babaen ti teknolohia.
Impasigurado met ni Gaudan ti seguridad dagiti datos nga ited dagiti agus-usar babaen ti sistema. (Hilda Austria/PNA)
