Mabalusingsing ti Konstitusion no mawaswas ti impeachment complaint maibusor ken ni Bise Presidente Sara Duterte, a saan nga agdalan iti impeachment trial, kinuna ni Senate Minority Leader Aquilino “Koko” Pimentel III, ita a Huebes, Hunio 5.
Daytoy ti imballaag ni Pimentel kalpasan ti panangikalikagum ni Senador Ronald “Bato” Dela Rosa a mangwaswas iti kaso nga impeachment ti bise presidente gapu iti kinakurang ti panawen ti Senado iti maika-19 a Kongreso.
Impetteng ni Pimentel a karbengan ti Senado ti agbalin a kas impeachment court apaman a maawatda ti Articles of Impeachment kontra ken ni Duterte manipud iti Kamara, ta isu dayta ti sagudayen ti Konstitusion.
Gapuna, ti mosion a mawaswas ti impeachment complaint iti ruar ti impeachment court a mangisayangkat iti trial, ket mailabsing iti linteg.
₱200 a nayon ti sueldo, tingitingen pay dagiti senador
Impaganetget ni Pimentel a masapul nga ag-convene dagiti senador kas maysa nga impeachment court tapno mabista ken mangngegda ti biang ti respondent, idinto nga agpaayda a kas senator-judges.
Innayon ni Pimentel a masapul a maikkan iti gundaway ti naidarum nga opisial a mangdepensa ken mangdalus iti naganna.
Ngem kinuna ni Senate President Francis “Chiz” Escudero nga awan ti naipila a resolusion nga agkidkiddaw iti pannakawaswas ti impeachment complaint iti Senado, ket ania man a resolusion nga awan autorna, ket maibilang laeng a maysa a papel.
Sakbay daytoy, kinompirmar ni Dela Rosa a naggapu iti opisinana ti draft ti resolusion nga agkidkiddaw iti de facto dismissal ti impeachment complaint maibusor ken ni Duterte.
Iti sabali a bangir, inanamongan ni Sen. Alan Peter Cayetano ti kapanunotan ni Pimentel, ket patienna nga awanen ti maaramidan dagiti kakaduana a senador no di tungpalen ti annongenda kas ibagbaga ti Konstitusion.
Sinupiat ni Senate President Pro Tempore Jinggoy Ejercito Estrada ti indiaya ni Dela Rosa, ta anamonganna a pagrebbengan ti Senado ti agbalin a kas impeachment court tapno tamingenda ti impeachment complaint. (Hannah L. Torregoza/Manila Bulletin//Lito Hilidon/Bannawag)
