Saan pay a yendorso wenno pirmaan ni Presidente Ferdinand Marcos Jr. ti singasing a ₱200 a ngatuan ti minimum wage, ta urayenna pay ti resulta ti panagsasarita iti Senado ken ti komprehensibo a pannakarepaso ti epekto daytoy iti ekonomia.
Daytoy ti kinuna ni Undersecretary ti Presidential Communications Office (PCO) Claire Castro ita nga aldaw, Hunio 5, kalpasan nga inanamongan dagiti 171 a diputado ti House Bill No. 11376, a mangipaay iti ₱200 a ngatuan iti inaldaw a sueldo.
Nabayagen nga ilunglungalong dagiti labor group ti nailian a pannakaingato ti sueldo, ta namayamay unay ti panagtignay dagiti regional board ken nababa latta ti matgedan kadagiti kaaduan a lugar.
Ngem imballaag dagiti grupo ti employer a ti naimandar a pannakaingato ket mabalin a mangitunda kadagiti babassit a negosio a mangkissay iti trabahadorda wenno mangiserra iti negosioda.
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Castro, silulukat ti presidente a mangsapul iti nainkalintegan ken praktikal a solusion, ta masapul pay nga agdalan ti gakat iti Senado.
Nupay anamongan ni Marcos ti pannakaingato ti sueldo, masapul a kitaen ti pakaseknan dagiti micro, small, and medium enterprises (MSME) ken ti epekto daytoy iti presio ti magatgatang. (Argyll Cyrus Geducos/Manila Bulletin//Lito Hilidon/Bannawag)
