Impaganetget ti Malakanyang ti panggepna a mangituloy iti Public Transport Modernization Program (PTMP), ngem inaklonna a masapul a naan-anay ti pannakaisagana dagiti drayber ken operator sakbay nga ituloyda daytoy.
Kastoy ti kinuna ni Undersecretary ti Presidential Communications Office Claire Castro idi Hunio 4, kalpasan nga inaklon ni Sekretario ti Department of Transportation (DOTr) Vince Dizon a "saan a mabalin" nga ipatungpal ti programa, a dati nga am-ammo a kas Public Utility Vehicle Modernization Program, iti agdama a kasasaad daytoy.
Segun ken ni Castro, anamongan ni Presidente Marcos ti paliiw ni Dizon.
Maysa kadagiti parikut a naidatag ti pagkasapulan iti panagsanay dagiti drayber ken operator iti panangimaton iti transport cooperative.
LPA iti Catanduanes, mangyeg iti nasaknap a panagtudo --PAGASA
Naidatag met ken ni Presidente Marcos ti parikut kas iti gatad ti moderno a lugan, ti parikut iti panagbayad iti utang, ken ti route rationalization.
Nupay awan ti waragawag mainaig iti ania man a pannakaisardeng ti PTMP, kinuna ni Castro a masapul a maisagana ti amin sakbay a mapan iti sumaruno a paset ti pannakamoderno ti transportasion.
Iti pannakisaritana iti Commission on Appointments (CA), kinuna ni Dizon nga adu ti parikut ti programa, kas iti panangisardeng dagiti banko nga agpautang para iti modernisasion, ken ti nababa a consolidation rate a 40 a porsiento. (Argyll Cyrus Geducos/Manila Bulletin//Lito Hilidon/Bannawag)
