Impalgak ti Department of Information and Communications Technology (DICT) iti House tri-committee (tri-comm) a planoda nga usaren ti artificial intelligence (AI) iti panang-monitor kontra kadagiti fake news ken online scams.
Timmabuno iti maudi a tri-comm hearing idi Hunio 5 ni DICT Secretary Henry Aguda, a kinunana a napasnek a makikioordinar ti DICT kadagiti nadumaduma a social media platform tapno malabanan ti online disinformation.
Imbinglay ni Aguda iti joint panel ti Kamara nga adda ar-aramidenda nga AI-powered system a mangduktal kadagiti fake news ken online scams.
Segun iti DICT, adu a nalalaing a Filipino ti mangdebdebelop kadagitoy a sistema. "Partuat ti Filipino, nalalaingda, nangaramidda iti sistema a mabalin a yerdorsomi ita iti Meta ken dadduma pay a platform tapno usarenda a pang-detect iti fake news. Aramid ti Filipino dayta," kinuna ni Aguda.
Pimmatay iti 2 a polis iti Bulacan, natay a nakipinnaltog iti Cagayan
"Inanamaenmi nga awaten ti Meta daytoy," innayon ni Aguda, a dakdakamatenna ti ti kompania nga akinkukua kadagiti nalatak a platform a Facebook ken Instagram.
Awan pay makabulan ti mid-term elections, a nagsaknapan ti naruay a fake news ken disinformation. Kinuna ti maysa nga opisial ti tri-comm a ni Surigao del Sur 2nd district Rep. Johnny Pimentel a pinuntiria isuna ti fake news iti napalabas a panagbobotos.
Maipanggep iti Meta, impakaammo ni Aguda iti tri-comm nga iwayat ti Meta ti maysa a sistema ti "demotion" a kas wagas tapno madagdagus a malimitaran ti pannakaiwaras dagiti paskil wenno impormasion nga itudo ti online community a kas di umisu wenno peke. (Ellson Quismorio/MANILA BULLETIN)
