Maysa a lalaki a suspek iti pannakapapatay ti dua a polis iti Bocaue, Bulacan idi Marso ti natay iti encounter kadagiti autoridad iti Barangay Bacagan, Baggao, Cagayan idi Martes, Hunio 3.
Natay a napaltogan ni Edison Bayumbon, alias "Xander," idi pinaputokanna agiti polis a mangiserbi iti warrant of arrest kontra kenkuana, segun iti Cagayan Police Provincial Office (CPPO), iti maysa nga statement idi Hunio 5.
"Napilitan a pimmaltog met dagiti polis, a nagresulta iti ipapatay ti suspek," kinuna ti CPPO.
Naakusaran ni Bayumbon nga adda pakainaiganna iti pannakapapatay da Police Staff Sgt. Dennis Cudiamat ken Police Staff Sgt. Gian George dela Cruz, agpada a kameng ti Bocaue Municipal Police, idi Marso 8, 2025.
DICT, agusar iti AI iti panang-monitor iti fake news, online scam
Naammuan dagiti polis nga aglemlemmeng ti suspek ti Barangay Bagacan a yan ti maysa kadagiti kakabsatna.
Nangisayangkat dagiti polis iti dua a lawas a surveillance tapno maammuan ti eksakto a lokasion ti suspek.
Segun pay iti CPPO, a madama ti imbestigasion tapno maammuan no adda kakomplot ni Bayumbon iti pannakapapatay dagiti dua a polis.
Kinuna met ni Police Brig. Gen. Antonio Marallag Jr., hepe ti Police Regional Office-02 nga awan pagkamangan dagiti kriminal iti Cagayan Valley (Region 02).
Pinadayawan ni Marallag dagiti operating unit ken dagiti lumugar ti Barangay Bagacan iti impormasion a nangitunda iti naballigi nga operasion kontra iti suspek. (Freddie Lazaro/MANILA BULLETIN/PNA)
