Impasingked ti Presidential Communications Office (PCO) ti panangsuportarna iti napigpigsa a pannakabukel ti alagaden iti social media ken online content, kas panangtungpal iti bilin ni Presidente Ferdinand Marcos Jr. a pannakataming ti dumakdakkel a pangta it fake news.
Iti naangay a tri-committee hearing ti Kamara, kinuna ni Sekretario ti PCO Jay Ruiz kadagiti kongresman a masapul nga adda depinision no ania ti "fake news" iti linteg ken adda dusa iti nairanta a pannakaiwaras daytoy, nangruna kadagiti narikut a tiempo kas iti eleksion.
"Panunotem no dagiti botante ket agbotos maibatay iti palso nga impormasion, ania a kita ti demokrasia ti adda kadatayo?" kinuna ni Ruiz.
Kinuna ni Ruiz a no saan a maatur, dadaelen dagiti palso nga impormasion ti kabaelan dagiti umili a nainsiriban a panagdesision ken iti kinasin-aw ti demokratiko a proseso.
Pimmatay iti 2 a polis iti Bulacan, natay a nakipinnaltog iti Cagayan
Anamongan ni Ruiz ti kalintegan ti tao iti impormasion, ngem dayta a kalintegan ket maipaay iti umisu nga impormasion.
Innayon ni Ruiz a no awan ti linteg a mangilawlawag no ania ti fake news ken dagiti dusa iti panangiwaras kadagitoy, kas iti Singapore ken Europa, saan a mariendaan ti gobierno ti panagwaras ti fake news iti social media. (Argyll Cyrus Geducos/Manila Bulletin//Lito Hilidon/Bannawag)
