Agarup ₱20 a milion ti balorna nga illegal a droga ti nakompiskar iti Davao City idi Domingo, Hunio 8, iti operasion nga insayangkat ti National Bureau of Investigation (NBI).
Segun iti NBI, nakompiskar dagiti droga bayat ti operasion a nairugi iti alas singko iti bigat iti maysa a residential unit iti Emily Homes, Cabantian, Davao City.
Naisayangkat ti operasion babaen dagiti operatiba ti NBI Southeastern Mindanao Regional Office (NBI SEMRO XI) nga idauluan ni Regional Director Arcelito C. Albao babaen ti pannakitinnulong ti Philippine Drug Enforcement Agency (PDEA) Region XI.
Saan ketdi nga impalgak ti NBI ti nagan dagiti natiliw kabayatan ti operasion.
Duterte, nagkiddaw iti interim release iti ICC
Nakompiskar ti 1.575 a kilo ti mapapati a methamphetamine hydrochloride wenno shabu nga aggatad iti ₱17.325 a milion; 4.885 a kilo a kush nga aggatad iti ₱5.86 a milion; nadumaduma a produkto a cannabis-based; Big Chief Guava live resin; Sluggers HIT disposables; heat sealers ken repackaging tools; ken food delivery boxes manipud iti Foodpanda ken Maxim a maus-usar a pangilemmeng iti panagiwaras iti droga.
Kinuna ti NBI a naiwayat ti operasion kalpasan a nakaawat ti ahensia iti report a “maysa a residential unit ti mapapati a maus-usar a repacking and distribution hub para iti illegal a droga.”
“Nairugi ti operasion a naibatay iti firsthand report manipud iti maysa nga informant a nagkiddaw iti tulong manipud iti NBI SEMRO XI,” kinuna pay ti NBI. (Jeffrey Damicog/MANILA BULLETIN)
