Manamnama a mangrugin nga operational ti Cagayan North Solar Project, ti kaunaan a solar farm iti Cagayan a masarakan iti ili ti Lal-lo, kadagiti sumarsaruno nga aldaw, iti pannakalpasen ti proyekto.
Iti maysa a pannakiuman ken ni Lal-lo Mayor Florante Pascual, kinunana nga agandaren iti mabiit ti solar power plant pga addaan iti kapasidad a mangpataud iti 133 a megawatt a koriente.
Kabaelan ti proyekto a mapagsilaw ti umabot iti 50,000 a sangakabbalayan babaen ti nadalus nga enerhia manipud iti lawag ti init.
Segun iti mayor, ti koriente a patauden ti proyekto ket mapan iti National Grid Corporation of the Philippines (NGCP) nga agserbi a power reserve iti Luzon grid. Makatulong met daytoy tapno maliklikan ti brown out ken kinakirang ti suplay ti koriente.
10-ektaria a plantasion ti kawayan a Beema, maisagsagana iti Ilocos Norte
Naponduan ti solar power plant iti ₱5 a bilion ken binangon ti kompania nga ACEN iti babaen ti Ayala Group ken CleanTech Renewable Energy Corporation.
Umawat met ti gobierno lokal ti Lal-lo iti 1% iti mapastrek ti kompania, a pagbibingayan ti probinsia, munisipio, ken dagiti barangay a nakaipatakderan ti solar farm.
Add met porsiento ti kita ti kompania a maipaay para iti corporate social responsibility nga eksklusibo a pagnumaran ti ili ti Lal-lo. Dinakamat ni Mayor Pascual ti pannakabangon ti pasdek para iti Bical National High School a pinonduan ti kompania iti ₱14 a milion gapu ta nalpasen ti solar farm project. Kasta met ti pannakabangon ti dua a multi-purpose gymnasium iti Brgy. Magapit ken Brgy. Sta. Maria nga aggatad iti ₱4 a milion.
Segun iti mayor, nakaipaay met ti nasao a proyekto iti pagtrabahuan dagiti rinibu nga umili ti La-lo ken kabangibang nga il-ili.
Kabayatanna, namnamaen met ni Mayor Pascual nga umay dagiti lokal ken ganggannaet nga investor gapu ta addan umdas a suplay ti koriente. Daytoy ti immuna a dinamag ken sinapul dagiti investor a nakasaritana.
Target ti mayor dagiti Taiwanese investors, nangruna dagiti factory owner, nga agpuonan iti ili ti Lal-lo tapno saanen a kasapulan nga ag-abroad dagiti Cagayano.
"Adu ti awan trabahoma a kailiantayo, isu a kunak a kasapulan nga agbiroktayo iti kompania tapno adda mastrekanda. Ti umuna a napanunotko ket dagiti paktoria; agawis kadagiti lokal ken ganggannaet nga investor iti ilitayo tapno adda panggedana. Ta tunggal adda aggraduar, agaplikar amin dagitoy iti munisipio. Uray kasano ti ayatko nga alaen ida ngem limitado ti badiet. Pumanawda ken mapanda kadagiti sabali a lugar tapno agbirokda iti trabaho," kinuna ni Mayor Pascual.
Kabayatanna, nangipasdek ti gobierno lokal iti view deck iti nasao a lugar para kadagiti bisita a mayat a mangbuya iti solar farm a masarakan iti Brgy. Magapit ken Brgy. Sta. Maria ken tapno agserbi a lokal a tourism spot iti Lal-lo. (Badz Heralde/Cagayan Provincial Information Office)
