Ingganetget dagiti senador idi Domingo, Hunio 8, ti madagdagus a panagtitipon ti bicameral conference committee a mangtaming iti wage hike bill tapno maipaay ti kasapulan unay a pannakaidur-as ti matgedan kadagiti trabahador iti pribado a sektor iti baet ti dumakdakkel a parikut iti ekonomia.
Gapu ta agpada a nagtignay ti Senado ken Kamara iti nasao a gakat a linteg, inulit ni Sen. Christopher "Bong" Go ti awag ti Trade Union Congress of the Philippines (TUCP) para iti madagdagus a bicameral conference tapno agtunos ti dua a bersion ken masigurado a makadanon ti pinal a gakat iti Malakanyang iti maika-19 a Kongreso.
Naaprobaran idi napan a tawen iti Senate Bill No. 2534 ti bersionna iti nasao a gakat a mangipaay iti ₱100 a ngatuan ti sueldo, idinto a naaprobaran idi Hunio 3 ti katukadna a House Bill No. 11376 a mangisingsingasing met iti ₱200.
“Sapay koma ta maipasatayo daytoy iti umisu a tiempo ta agpannuray ditoy ti pagimbagan ti adu a mangmangged a Filipino,” kinuna ni Go, nga impaganetgetna ti kinapateg ti panagtignay iti nasao a gakat bayat nga adda pay laeng ti sesion ti Kongreso.
Kasapulan ti natibker ken nainkalintegan a pagtaktakderan iti parikut iti WPS --NMC
“No saan a maipangpangruna daytoy, adda posibilidad a marikna dagiti trabahadortayo a kasla saan a naikankano dagiti kalikagumda,” impakdaar ni Go, nga intudona a nagbalinen a banag a kasapulan ti ekonomia ti panangingato iti sueldo iti baet dagiti dumakdakes a sosioekonomiko nga indikador.
Kinuna ni Senate Majority Leader Francis Tolentino a gapu ta insubmitir ti Kamara ti nagan dagiti conferees para iti bicameral meeting, rumbeng nga aramiden ti Senado ti isu met laeng a panagisubmitir iti kabiitan a panawen.
“Ti talaga a kasapulantayo iti daytoy a punto ket ti panangsalaknib kadagiti small and medium enterprises. Nangruna dagiti addaan empleado a nakurang a sangapulo. Sapay koma ta saanda unay a maapektaran,” kinuna ni Tolentino.
Segun pay ken ni Tolentino, napaliiwna nga awan ti probision iti bersion ti Senado nga espesipiko para kadagiti small and medium enterprises.
“Ti bersion ti Kamara, panagkunak, addaan sumagmamano nga insentibo. Isu nga agtutunos koma ti Senado ken Kamara iti daytoy a banag tapno saan a matay dagiti MSME, nangruna dagiti adda kadagiti probinsia,” kinunana.
Inulit met ni Sen. Sherwin Gatchalian ti isu met laeng nga awag a kunana nga adda madagdagus a panagkasapulan para iti bicam panel a dagus a mangtingiting iti dua a bersion ti gakat. Kinunana a masapul met nga ikonsiderar dagiti mammanday-linteg dagiti posible a pannakaikkat iti trabaho a mabalin a mapasamak apaman nga agepektibo ti gakat. (Hannah L. Torregoza/MANILA BULLETIN)
