Kinompirmar ni Presidente Ferdinand Marcos Jr. a saan a maituloy ti EDSA rehabilitation project agingga a saan a marisut ti rerouting plan ken ti pannakausar ti kabaruanan ken naparpartak a teknolohia tapno saan unay a mataktak ti publiko.
Iti kaudian a vlog-na, impaganetget ni Marcos ti imbilinna a pannakaisardeng pay laeng ti pannakatarimaan tapno saan a masinga dagiti agus-usar iti kangrunaan a kalsada iti Metro Manila.
Segun ken ni Marcos, agbirokda iti napimpintas a pamuspusan tapno saan unay a marigatan dagiti commuter. Ti kaawan ti pinal a rerouting plans ken saan pay a pannakaisagana dagiti local government unit ti kangrunaan a makagapu iti pannakaitantan ti proyekto.
Dati a naikeddeng a mangrugi inton Hunio 13 ken agpaut agingga iti 2027, agdalan ti EDSA rehabilitation project iti makabulan a pannakarepaso.
Minority bloc ti Senado, ilungalongda ti pannakairugi ti impeachment trial iti plenario
Dinutokan ni Marcos da Sekretario ti Department of Public Works and Highways (DPWH) Manuel Bonoan ken Sekretario ti Department of Transportation (DOTr) Vince Dizon a mangrepaso iti timeline ti proyekto, ken ti posibilidad a mayababa pay daytoy.
Inaklon ni Marcos a kasapulan unay a matarimaan ti EDSA, ngem ti kasasaad dagiti commuter ken motorista ti maipangpangruna.
Impasigurado ni Marcos nga agtultuloy ti pannakatarimaan ti impraestruktura, ngem saan a rumbeng a maapektaran ti pagnam-ayan ken kalidad ti panagbiag. (Argyll Cyrus Geducos/Manila Bulletin//Lito Hilidon/Bannawag)
