Ti “Chinese Drug Triad" ti pagtataudan ti nasurok a maysa a tonelada a shabu a nabiit pay a nakita dagiti lokal a mangngalap nga agtatapaw iti baybay ti Zambales, Pangasinan, ken Ilocos Sur, segun iti Philippine Drug Enforcement Agency (PDEA).
Kinuna ni Direktor ti PDEA Isagani R. Nerez a dagiti nasamsam a nabungon a pakete ti shabu, bungon ti tsaa a nasuratan iti Intsik, ket pagilasinan dagiti addaan pakainaigan iti "Chinese Drug Triad."
Kinuna ni Nerez a nalatak ti triad iti panangaramid kadagiti nadumaduma a wagas ti drug smuggling, agraman ti panagusar iti baybay. Ipatapawda iti baybay dagiti droga nga alaento met dagiti kakomplotda, ket naimbag laeng ta immuna dagiti mangngalap a nakakita kadagitoy sakbay nga adda sabali a makaala.
Kinuna ni Nerez a 52 a mangngalap ti nangisuko iti agarup 1,013 a pakete ti maatap a shabu kadagiti autoridad, a maibilang a maysa kadagiti kadakkelan a nasamsamda nga illegal a droga iti baybay.
Makaammon ni Apo Dios,” kinuna Sen. Imee Marcos iti komento ni BP Duterte iti pannakaisubli ni tatangna iti Filipinas
Agingga iti Hunio 8, nasamsam ti nagtipon nga operatiba ti PDEA, PCG, PNP, Philippine Navy (PN), ken National Bureau of Investigation (NBI) ti agdagup iti ₱6,888,400,000 ti balorna a shabu nga agdagsen iti agarup 1,013 a kilo segun iti damo a panangpattapattada.
Agtultuloy ti panagpatrulia ti PCG ken PN ken ti operasionda kadagiti kabangibang a baybay a kabuyog ti tulong dagiti umili ti Agno, Bani, ken Bolinao iti Pangasinan, ken iti Sta. Cruz, Ilocos Sur. (Chito Chavez/Manila Bulletin//Lito Hilidon/Bannawag)
