Naangay ti kaunaan a same-sex marriage iti Isabela idi Domingo, Hunio 8.
Nagkasar da Mart Andres ken Engs Bravo ti Barangay Nagbukel, San Isidro, Isabela, iti maysa a resort iti Barangay Santo Tomas, Alicia, Isabela.
Kinompirmar ni officiating priest Macario Sangcap, pastor ti Lovewins Christian Church Philippines nga addaan 7,400 followers iti Facebook, ti panagkasar da Andres ken Bravo.
Nupay kasta, inlawlawag ni Sangcap a saan pay a legal a mabigbig ti panagkasar dagiti dua.
Filipino iti Los Angeles, California, tiniliw ti ICE
"Saan pay a legal ti panagkasar ti LGBTQ iti Filipinas, ta saan pay a nagbalin a legal ti same-sex marriage ditoy, ngem saan met a maiparit ta salakniban daytoy ti freedom of religion," kinuna ni Sangcap.
Segun ken ni Sangcap, uray saan pay a legal ti panagkasar ti LGBTQ iti Filipinas, mausar ti Certificate of Holy Union kadagiti pagilian nga addaan iti marriage equality law/domestic partnership/civil union wenno same-sex marriage kas pammaneknek iti panagtiponda wenno pammaneknek iti relasonda a mausar dagiti ag-partner a mang-petition kadagiti partner-da wenno kaingungotda para iti spousal visa wenno family visa iti US, Canada, Australia, New Zealand, Europe, kdp.
Innayon ni Sangcap a mausar ti Certificate of Holy Union kas pammaneknek iti panagdenna wenno relasionda kadagiti insurance company, agraman iti joint account iti banko.
Nupay kasta, inlawlawag ni Sangcap a saan latta a masuktan ti apeliedo ti nagkallaysa ken saanda a mairehistro iti Philippine Statistics Authority (PSA) ta awan pay ti marriage equality law wenno linteg a mangbigbig kadagiti LGBTQ couple a kas maysa a pamilia, isu a saanda a maikkan iti marriage certificate wenno marriage license.
Nag-viral iti social media ti panagkasarda a nakaala iti nadumaduma a reaksion kadagiti netizen. (Liezle Basa Iñigo/Manila Bulletin//Lito Hilidon/Bannawag)
