Idagadag ti minority bloc ti Senado ti pannakairugi ti impeachment trial maibusor ken ni Bise Presidente Sara Duterte ita nga aldaw, Hunio 9.
Daytoy ti impalgak ni Senador Risa Hontiveros a panggep nga aramiden ti minoria iti plenario ti Senado inton 3:00 ti malem ita nga aldaw.
"Kailiak, saanmi a palubosan ti Senado nga isu ti umuna a mangbalusingsing iti Konstitusion. Isut' gapuna nga inton malem, iti plenario, gandat ti minoria ti Senado nga imosionda ti pannakairugi ti impeachment trial ni VP Duterte," kinuna ni Hontiveros.
Da Senate Minority Leader Aquilino “Koko” Pimentel III ken Hontiveros laeng ti tumaktakder a minority bloc iti Senado, ket kinuestionarda ti desision ni Senate President Francis “Chiz” Escudero a mangitantan iti impeachment trial iti laksid ti sinao ti Konstitusion a "forthwith" wenno "madagdagus."
Warrant of arrest nga ipaulog ti ICC, ipatungpal ti PNP
Inkeddeng ni Escudero ti pannakaiparang ti articles of impeachment inton Hunio 11, ti maudi nga aldaw ti sesion sakbay nga agserra ti 19th Congress.
Kinuna ni Hontiveros a kalpasan ti panangibasa dagiti prosecutor iti articles of impeachment, mabalinen nga ag-convene ti Senado kas maysa nga impeachment court, ken mabalindan ti agsapata a kas senator-judges.
Innayon ni Hontiveros a masapul nga ipangag ti Senado ti timek ti publiko a tungpalenda ti annongenda ken rugiandan ti impeachment trial. (Hannah L. Torregoza/Manila Bulletin//Lito Hilidon/Bannawag)
