Impasingked ni baro a hepe ti Philippine National Police (PNP) General Nicolas Torre III nga ipatungpal ti polisia ti warrant of arrest nga ipaulog ti International Criminal Court (ICC) maibusor kadagiti suspek iti drug war, no la ketdi agdalan daytoy iti umisu a wagas.
Daytoy ti kinuna ni Torre iti naangay a panangbista ti Quad-committee (quad-comm) ti Kamara ita nga aldaw, Hunio 9.
Nasaludsod ken ni Torre no ipatungpalna ti arrest warrant ti ICC kontra kadagiti suspek iti war on drugs, a pakairamanan ni Senador Ronald "Bato" dela Rosa.
Segun ken ni Torre masapul a maipatungpal ti warrant of arrest no agdalan iti umisu a wagas, idinto a saan a nagbaliw ti pagtaktakderan ti gobierno a saan a makitinnulong ti Filipinas iti ICC.
Defense panel ti rumbeng a mangipila iti pannakawaswas ti impeachment --Lacson
Ngem inlawlawag ni Torre nga adda dagiti wagas a mabalin nga usaren ti ICC kas iti International Criminal Police Organization (Interpol), tapno maipatungpal ti warrant of arrest, isu a no kiddawen ti Interpol a maipatungpal ti warrant, dayta ti maaramid tapno matungpal ti Filipinas ti karbenganna iti Interpol.
Idi Marso, tinulongan ni Torre ti Interpol iti pannakaarestar ni dati a presidente Rodrigo Duterte iti Manila. (Ellson Quismorio/Manila Bulletin//Lito Hilidon/Bannawag)
