Kinompirmar ti consul general ti Philippine Consulate iti Los Angeles, California a maysa a Filipino ti tiniliw ti Immigration and Customs Enforcement (ICE) ti Estados Unidos iti baet ti nasaknap nga operasion ti imigrasion nga iwaywayat ti goberno.
Kinuna ni Consul General Adelio Angelito Cruz ken iti Unang Balita ii GMA Integrated News iti interview ita a Martes, Hunio 10, nga "ekspektaren" ti konsulado a "maideportar" iti Filipinas ti nasao a Filipino, a maysa nga imigrante a sumangsango iti kaso a panagtakaw ken panangrames.
"Naarestar isuna gapu ta paset daytoy ti operasion ti ICE. Iti pagtaenganna ti nangarestaran kenkuana ti maysa nga opisial ti ICE ken maysa a parole officer," kinuna ti konsul.
Innayon ni Cruz a napakaammuan ti pamilia ti 55-anios a Filipino manipud Ontario, California mainaig iti pannakatiliw daytoy.
Senado, insublina ti impeachment case iti Kamara
Impasiguradona a sisasagana ti konsulado a tumulong iti natiliw a Filipino.
Nangiruar met ti Philippine Consulate iti Los Angeles iti advisory a mamakpakdaar iti komunidad dagiti Filipino nga "agannad ken agpaliiwda iti baet dagiti agtultuloy a protesta ti imigrasion a mapaspasamak iti sentro ti Los Angeles."
"Naibalakad a liklikanda ti ania man a panagtitipon ti tattao a mabalin nga agtungpal iti riribuk," innayonna.
Inlawlawag met ni Cruz nga awan ti Filipino a nakikadua kadagiti protesta kontra iti nainget a panangraut ti gobierno ti US kadagiti illegal nga imigrante.
Nangrugi dagiti protesta kalpasan a tiniliw dagiti ahente ti ICE ken dadduma pay ti nasurok a 40 nga imigrante kadagiti panagarestar a nangpuntiria kadagiti mangmangged. Gapu kadagiti a panagarestar, naiwayat dagiti rali gapu iti panangkomprontar dagiti kabagian dagiti natiliw ken dagiti agprotprotestar kadagiti pederal nga ahente.
Gapu met itoy, minandaran ni US President Donald Trump ti California National Guard a manglapped kadagiti rali, nga awan ti pammalubos dagiti lider ti estado. (Raymond Antonio/MANILA BULLETIN)
