Kalpasan ti atiddog a diskusion, inanamongan met laeng ti plenario ti Senado idi Hunio 9 ti mosion ni Senador Joel Villanueva nga agsapata ni Senate President Francis "Chiz" Escudero a kas Presiding Officer ti impeachment court a mangtaming iti impeachment complaint a maibusor ken ni Bise Presidente Sara Duterte.
Ni Senate Minority Leader Aquilino “Koko” Pimentel III ti immuna a nangidatag iti mosion a mangdagadag iti Senado a tungpalenda ti pagrebbenganda ket isayangkatda ti impeachment trial.
Segun ken ni Villanueva, immanamong ni Pimentel nga amendaranna ti immuna a mosion daytoy.
Kalpasan ti atiddog a saritaan, inmosion ni Villanueva a mayawat ti impeachment complaint ni Duterte iti Senate Committee on Rules, ket naanamongan daytoy.
Filipino iti Los Angeles, California, tiniliw ti ICE
Sakbay a maidatag ni Villanueva ti sumaruno a mosionna nga agsapata dagiti senador a kas senator-judges inton Hunio 10, inimtuod ni Senador Ronald "Bato" Dela Rosa maipapan iti pannakabukel ti impeachment court apaman a makapagsapata dagiti senador.
Insungbat ni Villanueva a saan a mabukel ti impeachment court uray makapagsapatan dagiti senador a kas senator-judges
Ngem segun ken ni Pimentel, kaawatanen a nabukel ti impeachment court apaman nagsapatada a kas senator-judges.
Gapu iti daytoy, sinupiat ni Dela Rosa ti mosion no kaipapanan daytoy ti pannakabuangay ti impeachment court, a nagdidiskutiran manen dagiti senador.
Idi agsubli ti sesion sakbay ti 9:00 iti rabii, inmosion ni Villanueva nga agsapata ni Escudero a kas presiding officer ti impeachment court, ket naanamongan daytoy.
Nagsapata ni Escudero iti sango ni Senate Secretary Renato N. Bantug Jr.
Kalpasan daytoy, inmosion manen ni Villanueva nga agsapata dagiti senator-judge iti Hunio 10 iti 4:00 iti malem. Ngem inlawlawagna a nupay mabukel ti impeachment court, saan pay nga ag-convene daytoy. (Dhel Nazario/Manila Bulletin//Lito Hilidon/Bannawag)
