Naikagumaanan ni top seed Alex Eala ti immabante manipud iti narikut nga opening set tapno maparmekna ni Fil-Australian Lizette Cabrera, 7-6 (4), 6-3, iti panangrugi ti Lexus Ilkley Open iti Great Britain idi Martes, Hunio 10 (nasapa a Mierkoles, oras ti Pilipinas).
Narigatan ngem sibaballigi ni Eala, 20-anios, a nangatiw iti napinget a dati a doubles partner-na, iti Women’s Tennis Association (WTA125) tournament match a nagpaut iti maysa nga oras ken 46 a minuto.
Daytoy ti umuna a panagballigi ni Eala iti grass a tennis court iti maikadua a torneona iti season kalpasan a nasapa a naarus iti Birmingham Open idi napan a lawas.
Addaan rank a maika-77 iti sangalubongan, ingganetget ni Eala ti immabante manipud iti 1-3 a depisit iti umuna a set ken pinagtalinaedna a nadekket ti laban babaen ti panangipatasna kadagiti iskor iti 3-all ken 5-all sakbay a naipilitna ti tiebreak.
Visa-free entry dagiti Filipino a sumrek iti Taiwan, nayalud-od agingga iti 2026
Nagun-od ni Eala ti kontrol ti maikadua a frame kalpasan ti balligina iti opening-set iti laksid ti napinget a panangpadas ni Cabrera, a nangbaut iti pito nga aces iti entero a laban.
Iti daytoy a balligina, sumaruno a lumaban ni Eala iti maikadua a round a pangsanguanna ken ni rank no. 230 ken 24-anios a Valentina Ryser ti Switzerland, sabali pay a hard-serving player a nangparmek iti Haponesa a ni Sara Saito, 6-0, 6-4.
Maikatlo daytoy a panagsango da Eala ken Ryser. Immuna a nagsangoda iti W25 Yecla iti Spain dua a tawenen ti napalabas, a nangabakan ti Filipina iti finals match-da, 6-3, 7-5.
Nupay kasta, iti maikadua a panagsangoda, inatiw ni Ryser ni Eala iti tallo a set iti maikadua a round ti W75 Trnava iti Slovakia idi laeng Marso.
Nakayalaten ni Ryser iti pito nga International Tennis Federation (ITF) singles titles, idinto a lima metten ken ni Eala. (Kristel Satumbaga-Villar/MANILA BULLETIN)
