Mabalin kadi nga ipila ti maysa a hues ti mosion para iti pagimbagan ti maysa nga akusado--iti daytoy a kaso, ni Bise Presidente Sara Duterte?
Sinaludsod daytoy ni incoming Akbayan Party-list Rep. Chel Diokno iti baet ti "grave abuse of discretion" a mapapati nga inaramid ti Senado idi insublida iti Kamara ti impeachment complaint kontra ken ni Duterte.
"Dayta ti pakasdaawanmi, mabalin kadi a mangipila ti hues iti mosion?" kinuna ni Diokno, maysa kadagiti House prosecutor iti impeachment, iti maysa nga interbiu idi ita a Mierkoles, Hunio 11.
"Iti korte, ti agipila iti mosion ket ti prosekusion wenno ti depensa. Isu a dayta (inaramid dagiti senator-judge), maysa a nbanag a nakitami a pananglabsing, saan laeng nga iti Konstitusion, no di pay ket dagiti pagannurotan nga inaprobaranda," kinunana maipapan kadagiti senador.
Visa-free entry dagiti Filipino a sumrek iti Taiwan, nayalud-od agingga iti 2026
"Nalabit, ipagarup pay laeng ti dadduma a senador ti bagbagida a kas lawmaker. Ngem kasapulan nga ipalagiptayo kadakuada a senator-judges-da--nagsapatada a kas senador-judge," kinuna ni Diokno.
"Binarengbarengda ti Konstitusion ket talaga a nalawag a grave abuse of discretion dayta," innayonna.
Inmosion ni Senador Ronald "Bato" dela Rosa a ma-dismiss ti impeachment complaint ngem binaliwan ni Senador Alan Peter Cayetano tapno maisubli laeng ti complaint iti Kamara. Binotosan dagiti senator-judge ti nasao a mosion, 18-5.
"Saan nga agtugaw ti Senado a kas lawmaking body (itoy a kaso), imbes ketdi, agakemda a kas senator-judges," kinuna ni Diokno. (Ellson Quismorio/MANILA BULLETIN)
