Pinasingkedan ti Kamara ti rekomendasion ti Quad-committee (quad-comm) a mangipila iti kaso kontra ken ni dati a presidente Rodrigo Duterte mainaig kadagiti extrajudicial killings (EJKs) iti war on drugs, kalpasan nga inadaptar ti plenario ti pinal a committee report-da idi Hunio 10.
Inlungalong ni Surigao del Norte 2nd district Rep. Robert Ace Barbers, daulo ti quad-comm, ti Committee Report No.1501 a nangisingasing iti pannakaidarum ni Duterte maibatay iti Section 6 (Other Crimes Against Humanity) of Republic Act No. 9851.
Inrekomendar pay ti quad-comm ti pannakaipila ti isu met la a kaso kada Senador Ronald "Bato" dela Rosa ken Christopher "Bong" Go, dati a hepe ti Philippine National Police (PNP) Oscar Albayalde ken Debold Sinas, ken da Police Col. Royina Garma ken Edilberto Leonardo.
Insingasing pay ti quad-comm a maidarum da Duterte, Garma, Leonardo, SPO4 Arthur Narsolis, ken Supt. Gerardo Padilla iti kaso a pammapatay (murder) gapu iti pannakapapatay dagiti tallo a balud nga Intsik iti Davao Prison and Penal Farm idi Agosto 13, 2016.
Visa-free entry dagiti Filipino a sumrek iti Taiwan, nayalud-od agingga iti 2026
Innayonda a masapul a maimbestigar dagiti maipagarup a joint bank account ti dati a presidente ken ti anakna a ni Bise Presidente Sara Duterte, kalpasan ti imbutaktak ni dati a senador Antonio Trillanes IV iti quad-comm hearing a dagitoy nga account ket umaw-awat iti kuarta manipud ken ni Sammy Uy, nga adda pakainaiganna iti droga.
Pinirmaan ni Barbers ti committee report agraman dagiti kakaduana a da Santa Rosa City lone district Rep. Dan Fernandez, Manila 6th district Rep. Bienvenido "Benny" Abante Jr., ken Abang Lingkod Party-list Rep. Joseph Stephen "Caraps" Paduano. (Ellson Quismorio/Manila Bulletin//Lito Hilidon/Bannawag)
