Pormal nga impaulog ti Senado, nga agtigtignay a kas impeachment court, idi Martes, Hunio 10, ti writ of summons ken ni Vice President Sara Duterte, a mangibilin kenkuana a sumungbat kadagiti articles of impeachment iti uneg ti 10 nga aldaw manipud pannakaawat.
Impakaammo ni presiding officer ken Senate President Francis "Chiz" Escudero ti pannakaipaulog ti summons di nagbayag kalpasan a nagbotos ti Senado iti 18-5 tapno maisubli ti impeachment case iti Kamara para iti klaripikasion.
Inlawlawag ni Escudero a saan a dismissal ti pannakaisubli ti kaso, ken sitatalinaed nga aktibo ti proseso ti impeachment.
"Iti sumagmamano a minuto, babaen ti pannakaipaulog ti summons, nalawag nga awan ti kasta a panggep a mang-dismiss iti kaso," kinuna ni Escudero.
Defense panel ti rumbeng a mangipila iti pannakawaswas ti impeachment --Lacson
"Adda intension daytoy nga impeachment court a mangtungpal kadagiti pagannurotan, iti kabassitan agingga iti pannakaipaulog ti summons iti babaen ti Rules-tayo ken bayat ti maika-19 a Kongreso," innayonna.
Impaganetget ni Escudero a ti panagbobotos dagiti senator-judge ket saan a mangbukel iti pangngeddeng no sinalungasing ti Kamara ti constitutional one-year ban iti multiple impeachment attempts, ken saanna met a sinakbayan ti panagtignay sumaruno a maika-20 a Kongreso.
"Ti panggep ket mangted kadagiti prosecutor iti gundaway a mangtaming kadagiti legal a pakaseknan a saan a mangsayang iti panawen ti korte wenno pre-judging iti kaso," kinunana.
Iti sidong ti Artikulo 7 ti Senate Rules of Procedure on Impeachment Trials, ti pannakaipaulog ti summons ket sumaruno kalpasan ti pormal a pannakaorganisar ti impeachment court ken ti pannakaidatag dagiti artikulo ti impeachment.
Masapul nga ipila ti bise presidente ti sungbatna iti uneg ti saan a mayalud-od a 10 nga aldaw manipud pannakaawat ti summons. Dagiti met prosecutor, addaanda iti lima nga aldaw a mangipila iti sungbatda. (Wilnard Bacelonia/PNA)
