Inadaptar ti Kamara idi Hunio 10, ti rekomendasion a maipila ti kaso a plunder, technical malversation, ken bribery kontra ken ni Bise Presidente Sara Duterte ken dadduma pay a personalidad mainaig iti maipagarup a di umisu a panangusar ti Office of the Vice President (OVP) iti ₱612.5 a milion a balor ti confidential fund.
Nairaman dagitoy a rekomendasion iti Committee Report No.1503 nga indatag ti Committee on Good Government and Public Accountability (CGGPA) ti Kamara, nga idadauluan ni Manila 3rd district Rep. Joel Chua.
Ti CGGPA ti 19th Congress ti nangisayangkat iti investigation in aid of legislation iti maipagarup a di umisu a pannakausar ti ₱612.5 a milion a confidential fund ti OVP ken Department of Education (DepEd), nga agpada nga idauluan ni Duterte.
Maibatay iti rekomendasion ti CGGPA, maidarum iti kaso a plunder segun iti Republic Act No. 7080 da Bise Presidente Duterte, dagiti opisial ti DepEd a da Mr. Fajarda, Atty. Fajarda, Maj. Gen. Mempin, Lt. Col. Nolasco, Col. Lachica, Usec. Sevilla; kasta met dagiti opisial ti OVP a da Atty. Lopez, Mr. Ortonio, Ms. Acosta, Col. Lachica, ken dadduma pay (John Does), gapu iti panangalada iti di nababbaba ngem iti ₱50 a milion manipud iti pondo ti publiko a di umisu ti pannakausarna. (Ellson Quismorio/Manila Bulletin//Lito Hilidon/Bannawag)
