Napaay dagiti abogado ni dati a presidente Rodrigo Duterte a mangpadiskualipikar iti dua nga ukom ti Pre-Trial Chamber I (PTC I) ti International Criminal Court (ICC) nga agdesision iti isyu ti hurisdiksion nga impila dagiti abogado ni Duterte.
Iti maysa a dokumento idi Hunio 9 a naipaskil iti website ti ICC, kinuna ti ICC a nagtataripnong dagiti ukom tapno desisionanda ti kiddaw ti kampo ni Duterte a masukatan koma dagiti kameng ti PTC I babaen ti pannakadiskualipikar da Judge Reine Adélaïde Sophie Alapini-Gansou, ken Judge María del Socorro Flores Liera.
Iti sungbatda iti kiddaw a pannakadiskualipikarda, sinupiat da Alapini-Gansou ken Liera ti imbaga ni Duterte, ket impettengda nga awan ti nainkalintegan a makagapu iti pannakailaksidda wenno ti pannakadiskualipikarda iti kaso.
Segun ken ni Judge Tomoko Akane, a Plenary President, nagkaykaysa dagiti plenary of judges iti pangngeddengda a saanda a patgan ti kiddaw ti kampo ni Duterte. Innayonda nga iruardanto ti sibubukel a nainkalintegan a pangngeddengda.
Idi Mayo 1, impila dagiti abogado ni Duterte ti “Defense Challenge with Respect to Jurisdiction” a mangkuestionar iti hurisdiksion ti ICC iti crimes against humanity a naipila kontra ken ni Duterte, gapu ta saanen a paset ti Filipinas iti Rome Statute idi naaramid ti prelimanry investigation iti war on drugs idi 2021.
Awan ti nangraut iti Senado --DILG Sec. Remulla
Kiniddawda met ti pannakadiskualipikar ti dua nga ukom nga agdesision iti panangkaritda iti hurisdiksion ti ICC gapu ta dagiti dua a hues ti nagbalin a paset iti chamber a nangpalubos iti ICC prosecutor a mangiwayat iti imbestigasion.
Kiniddaw met ti prosecution ti pannakawaswas ti kiddaw ti kampo ni Duterte.
Ti pannakakuestionar iti hurisdiksion ti ICC ti kangrunaan a paset ti depensa iti kaso ti dati a presidente ta daytoy ti mangikeddeng no agtuloy wenno saan ti ICC iti pannakausig ni Duterte, ken ti agtultuloy a pannakaditenena iti The Hague. (Raymund Antonio/Manila Bulletin//Lito Hilidon/Bannawag)
