Kinuestionar ni kabbotos a Senador Vicente “Tito” Sotto III ti pangngeddeng ti Senado a nangtaming iti motion to dismiss kontra iti impeachment case ni Bise Presidente Sara Duterte uray saan pay a naiparang dagiti prosecutor ti Kamara ti articles of impeachment.
Daytoy ti kinuna ni Sotto kas panangsupiatna iti desision ti Senado a pannakaisubli ti articles of impeachment iti Kamara.
Inanamongan dagiti 18 a senador ti pannakaisubli ti articles of impeachment a da Senate President Francis “Chiz” Escudero, Senador Alan Peter Cayetano, Pia Cayetano, Ronald “Bato” Dela Rosa, Christopher “Bong” Go, Loren Legarda, Raffy Tulfo, Ramon “Bong” Revilla Jr., Robinhood Padilla, Imee Marcos Manotoc, Cynthia Villar, Mark Villar, Joel Villanueva, Joseph Victor “JV” Ejercito, Jinggoy Ejercito Estrada, Francis Tolentino, Manuel “Lito” Lapid, ken Juan Miguel “Migz” Zubiri.
Lima a senador ti nangsupiat, da Senate Minority Leader Aquilino “Koko” Pimentel III, Senador Risa Hontiveros, Grace Poe, Nancy Binay, ken Sherwin Gatchalian.
Defense panel ti rumbeng a mangipila iti pannakawaswas ti impeachment --Lacson
Segun ken ni Sotto, saanen a pulos a kasapulan nga isubli ti kaso iti maika-19 a Kongreso ta isudan a mismo ti nangipila iti impeachment.
"Adda presumption of regularity iti panangaramid iti panangtungpal iti opisial nga annongen. Nalipatan san dagiti senador daytoy a prinsipio iti aramid ti Kamara," kinuna ni Sotto.
Kinunana pay a ti laeng Korte Suprema ti makaibaga nga "unconstitutional" ti maysa a banag, saan a ti Senado wenno ti impeachment court.
Impaganetget ni Sotto a saan a ti plenario ti kangatuan, no di ket ti Konstitusion.
Iti sabali a bangir, kinuna ni dati a Solicitor General Florin Hilbay a ti inaramid ti Senado ket pakakitaan iti politikal a kababalin ti impeachment.
Babaen ti pannakaisubli ti articles of impeachment iti Kamara, kinuna ni Hilbay a naikkan iti gundaway ti Kamara a kitaenda manen ti dokumento.
Ngem innayon ni Hilbay a no saan nga awaten ti Kamara ti isubli ti Senado, awan maaramidan ti Senado no di ti mangituloy iti impeachment trial. (Hannah L. Torregoza/Manila Bulletin//Lito Hilidon/Bannawag)
