Kinompirmar ti Office of the Vice President (OVP) ita nga aldaw, Hunio 11, a naawatdan ti summon manipud iti impeachment court ti Senado.
Saan a nagkomento ti OVP maipapan kadagiti napasamak iti Senado idi Hunio 10 a nangikeddeng a maisubli ti articles of impeachment iti Kamara.
Ngem impatulod ni Senate President Francis Escudero, presiding officer ti impeachment court, ti summon kontra iti bise presidente.
Iti summon, naibinsbinsa dagiti pito nga articles of impeachment kontra ken ni Duterte, ket naibilin kenkuana a mangipila iti sungbatna iti las-ud ti 10 nga aldaw manipud iti pannakaawat iti summon.
Defense panel ti rumbeng a mangipila iti pannakawaswas ti impeachment --Lacson
Naibilin pay ken ni Duterte nga agparang iti impeachment court ti Senado iti aldaw ken oras nga ikeddeng ti presiding officer.
Ngem kinuna ti OVP idi Hunio 10 nga adda personal a biahe ni Duterte a kaduana ti pamiliana iti Kuala Lumpur, Malaysia.
Nupay kasta, adda opisial nga annongen a tungpalenna iti idadar-ayna iti pannakarambak ti Independence Day ken ti OVP program consultation kadagiti overseas Filipino workers inton Hunio 12. (Raymund Antonio/Manila Bulletin//Lito Hilidon/Bannawag)
