Pormal a kiniddaw ni dati a presidente Rodrigo Duterte ti interim release manipud iti International Criminal Court (ICC), babaen dagiti abogadona a nangikalintegan a saanen a mayaplikar dagiti kondision para iti agtultuloy a pannakaidetinena, ken awan ti posibilidad nga aglibas, saan a pangta kadagiti saksi, wenno mangrakrak iti integridad ti kaso.
Iti redacted version ti urgent motion a naidatag iti ICC Pre-Trial Chamber I itay Hunio 12, kinuna dagiti abogado ni Duterte a saan a naragpat ni Duterte ti legal threshold ti Article 58(1)(b) ti Rome Statute, ket ngarud, masapul a mawayawayaan manipud iti kustodia ti ICC, bayat a maur-uray ti confirmation of charges inton Septiembre 23.
Segun kadagiti abogado ni Duterte, awanen dagiti kongkreto a pagpeggadan segun iti Article 58(1)(b)(iii) a mangikalintegan iti agtultuloy a pannakaipupok ni Duterte sakbay ti pannakabistana ken impaganetgetda a ti edadna, kasasaad ti salun-atna, ken ti kaawannan iti politika ti mangpaneknek nga awanen ti kabaelanna a mangimpluensia kadagiti saksi, mangpanaw iti hurisdiksion, wenno manglapped iti panagtulid ti hustisia.
Kinuna dagiti abogado ni Duterte a saan a supiaten ti Office of the Prosecutor ti ICC ti kiddaw nga interim release ni Duterte, no la ket adda cooperating State nga umanamong kadagiti nainget a kondision.
Makaammon ni Apo Dios,” kinuna Sen. Imee Marcos iti komento ni BP Duterte iti pannakaisubli ni tatangna iti Filipinas
Saan pay a naipalgak iti publiko no ania a pagilian ti agpaay a kas cooperating State (wenno host country) a mangpasangbay ken ni Duterte, kas maitunos kadagiti kondision nga ipaulog ti Chamber.
Malaksid iti daytoy, inkari ni Duterte nga agtalinaed iti host country, liklikanna ti makisarita iti publiko malaksid kadagiti pamiliana, ken saan nga agusar iti internet wenno mobile device no bilang mapatgan ti kiddawna. (Argyll Cyrus Geducos/Manila Bulletin//Lito Hilidon/Bannawag)
