Sinupiat ni Presidente Marcos Jr. ti akusasion a laplapdanna ti ₱200 a legislated wage hike a nakapila ita iti Kongreso, ket kinunana a raemenna ti maar-aramid a panagsasarita maipapan iti daytoy ken suportaranna ti pagsayaatan dagiti Filipino a mangmangged.
Daytoy ti kinuna ni Undersecretary ti Presidential Communications Office (PCO) Claire Castro ita nga aldaw, Hunio 13, kalpasan ti pammabasol ti Kabataan Party-list a ”patpatayen” ti Presidente ti singasing a wage hike tapno salaknibanna dagiti nababaknang a negosiante.
Impaganetget ni Castro a saan a diktador ni Presidente Marcos Jr. ket raemenna ti separation of powers ken saanna a bibiangen ti agwaywayas a mandato ti Kongreso.
Impalagip ni Castro iti publiko a malaksid iti singasing a linteg, tinawen a reprepasuen ken naynayonan ti gobierno ti sueldo iti tunggal rehion babaen ti Regional Tripartite Wages and Productivity Boards.
Visa-free entry dagiti Filipino a sumrek iti Taiwan, nayalud-od agingga iti 2026
Apagtapog ti Hunio idi anamongan ti Kamara ti ₱200 a legislated wage hike, idinto nga inaprobaran ti Senado ti bersionna idi napan a tawen.
Itay kallabes, kinuna ni Castro a saan pay a yendorso wenno pirmaan ni Marcos ti singasing a ₱200 wage hike, ngem impaganetgetna a kasapulan ti patas ken praktikal a resolusion daytoy. (Argyll Cyrus Geducos/Manila Bulletin//Lito Hilidon/Bannawag)
