Kinuna ni human rights lawyer Neri Colmenares ita nga aldaw, Hunio 13, a supiatenna ti interim release ni dati a presidente Rodrigo Duterte manipud iti International Criminal Court (ICC) no mapatgan daytoy.
Kinuna daytoy ni Colmenares kalpasan ti pormal a panagkiddaw ti abogado ni Duterte a ni Nicholas Kaufman iti interim release ni Duterte iti di pay naipalgak a pagilian, a nangyebkas iti panangawatda ken ni Duterte.
Segun ken ni Colmenares nga abogado dagiti biktima ti war on drugs ti administrasion ni Duterte, adda kalintegan dagiti biktima a pormal a mangsupiat iti kiddaw ni Duterte ta adda iti proseso ti ICC a kasapulan ti panagkomento ti prosekusion sakbay nga ipaulog ti ICC Pre-Trial Chamber (PTC) ti pangngeddengna iti kiddaw ni Duterte.
Kinuna ni Colmenares a mailabsing ti interim release iti Article 58 ti Rome Statute, nga agkunkuna a ti naikkan iti interim release ket masapul nga agparang iti panagbista, ken saanna a lapdan wenno pagpeggaden ti imbestigasion wenno ti panangbista ti korte.
Pananggatang iti 12 nga FA-50 fighter jets, makompleto inton 2030
Kinuna ni Colmenares a maat-atakar dagiti biktima ken dagiti abogadoda kalpasan ti pannakaarestar ni Duterte, ket kumaro pay daytoy no mapatgan ti interim release ni Duterte.
Kinuna ni Colmenares a gapu iti historia ti pangta, panangriribuk, agraman panangpapatay kadagiti biktima, saksi, ken human rights lawyer, lumanlan dagitoy no mawayawayaan ni Duterte.
Indagadag ni Colmenares iti ICC a saanda koma a patgan ti kiddaw ni Duterte tapno saanen a kumaro ti pangta kadagiti biktima ken abogadoda.
Innayonna a maipangpangruna koma ti kinatalged dagiti agsapsapul iti hustisia ngem iti pagnam-ayan ti akusado. (Joseph Pedrajas/Manila Bulletin//Lito Hilidon/Bannawag)
