Nagibales ti Iran itay rabii ti Biernes, Hunio 13, babaen ti panangibulosda kadagiti agsasaruno a ballistic missile a maibusor iti Israel, a nangpataud iti kanalbuong ken panagbettak iti tangatang ti Jerusalem ken Tel Aviv ken nangdayyeg kadagiti pasdek.
Iti maikadua nga iraraut, nagallangogan dagiti sirena ken kanalbuong manipud kadagiti interceptor ti Israel itay Sabado ti agsapa. Indagadag ti militar ti Israel kadagiti sibilian nga agkamangda iti natalged a lugar.
Sakbay daytoy, rinaut ti Israel ti yan ti nuklear ken militar a pasdek ti Iran, ket nangipatulod kadagiti eroplano a pakigubat ken drone a dati a naipuslit iti pagilian tapno rippuogenda dagiti kangrunaan a pasilidad ken mapugipog dagiti nangato a heneral ken sientista - maysa a panangraut a kinuna ti Israel a kasapulan sakbay a makaaramid ti kabusorda iti nuklear nga armas.
Segun iti U.N. ambassador ti Iran, 78 ti natay a tao ken nasurok a 320 ti nadangran iti iraraut ti Israel.
Maysa laeng a pasahero ti nakalasat iti pannakatnag ti Air India
Iti maysa a nairekord a mensahe, kinuna ni Ayatollah Ali Khamenei, Supreme ti Leader ti Iran, a saanda nga ipalubos a makalapsut ti Israel iti dakkel a krimen nga inaramidda ket insapatana ti panagibalesda.
Nasaripatpatan dagiti periodista ti Associated Press a dua a missile ti Iran ti nagdisso iti Tel Aviv, ngem awan ti dagus a naipadamag maipapan kadagiti naapektaran. Kinuna ketdi dagiti paramedic ti Israel a 34 a tao ti natay ken 34 ti nadangran iti Tel Aviv.
Segun iti maysa nga opisial ti Estados Unidos a di nangipalgak iti kinaasinona, tumultulong dagiti ground-based air defense system ti Estados Unidos iti rehion a mangparmek kadagiti missile ti Iran.
Binabalaw dagiti pagilian iti rehion ti panangraut ti Israel iti Iran, idinto nga indagadag dagiti dadaulo ti nadumaduma a pagilian iti Israel ken Iran a dida koma pakaruen ti gubat. (Associated Press/Manila Bulletin//Lito Hilidon/Bannawag)
