Makompleto inton 2030 ti pannakaideliber dagiti 12 a baro nga FA-50 fighter jet a ginatang ti Philippine Air Force (PAF), kas impalgak ti Department of National Defense (DND) ita nga aldaw, Hunio 14.
Pinatalgedan ti panakangiwat ti DND a ni Asst. Sec. Arsenio Andolong ti pananggatangda iti 12 nga FA-50 Block 70 light combat aircraft manipud iti Korea Aerospace Industries, Ltd. (KAI) ti South Korea, kas paset ti programa a pannakapamoderno ti Armed Forces of the Philippines (AFP).
Segun ken ni Andolong, main-inut a maideliber dagiti para gubat nga eroplano iti las-ud ti sumaganad a lima a tawen a manamnama a makompleto inton 2030.
Kinuna ti DND a nangteddan iti notice to proceed iti KAI itoy a bulan, a namagbalin a pormal ti kontrata nga agbalor iti agarup US$700 a milion wenno ₱39 a bilion.
Visa-free entry dagiti Filipino a sumrek iti Taiwan, nayalud-od agingga iti 2026
Mairaman iti package ti mission equipment, integrated logistics support, ken ti panagsanay ken logistics information system.
Segun iti DND, ti FA-50 Block 70 ti mangibagi iti kaudian a panagdur-as ti FA-50 platform, a mangitampok iti advance avionics, moderno a radar system, ken nasaksaknap nga operational range.
Kinuna ni Andolong a paset daytoy ti tarigagay ti gobierno a mapabileg ti depensa iti tangatang ti pagilian ken maitunos iti Comprehensive Archipelagic Defense Concept ti DND. (Martin Sadongdong/Manila Bulletin//Lito Hilidon/Bannawag)
