Imbalakad ti Philippine Army (PA) iti publiko ita nga aldaw, Hunio 14, a dida koma aglagaw no makitada kadagiti trak ti militar kadagiti kalsada nga agturong iti Amianan a Luzon.
Segun iti panakangiwat ti PA a ni Col. Louie Dema-ala, paset daytoy ti bilateral large-scale logistics training iti nagbaetan ti PA ken ti Army Pacific ti Estados Unidos (US) a maangay manipud iti Hunio 16 agingga iti 18 tapno mapasayaat pay ti panagtinnulong ken panagsagana dagiti dua a puersa.
Makipaset ti 1,200 a kameng ti 5th Infantry Division ti PA ken ti 25th Infantry Division ti US Army.
Usaren dagiti makipaset a soldado dagiti lugan militar nga agbiahe manipud iti Fort Magsaysay iti Nueva Ecija agingga iti Camp Melchor Dela Cruz iti Isabela a lumabas kadagiti nadumaduma nga ili iti Central ken Northern Luzon.
Visa-free entry dagiti Filipino a sumrek iti Taiwan, nayalud-od agingga iti 2026
Impakdaar ni Dema-ala kadagiti umili a siaammoda koma iti ilalabas dagiti lugan dagiti soldado iti kalsada ken agannad no agmanmanehoda iti asideg dagiti lugan militar.
Kinuna ti daulo ti PA a ni Lt. Gen. Roy Galido a ti dakkel a lohistika ken pannakasustener ti maysa kadagiti dakkel a pakaseknan ti PA a kas panangpasayaatda iti kabaelanda iti depensa. (Martin Sadongdong/Manila Bulletin//Lito Hilidon/Bannawag)
