Nakasublin iti Filipinas dagiti 18 nga overseas Filipino workers (OFWs) a nalakon idiay Dubai kas paset ti repatriation program nga ipatpatungpal ti gobierno para kadagiti Filipino a nairaman iti panaggubat ti Israel ken Iran.
Personal a sinabet ni Sekretario ti Department of Migrant Workers Hans Leo Cacdac dagiti 18 nga OFW a simmangpet iti Ninoy Aquino International Airport (NAIA) Terminal 1 itay agsapa ti Lunes, Hunio 16.
Agtrabaho koma dagiti 18 nga OFW iti Israel ken Jordan ngem nalakonda gapu iti panangraut ti Israel iti Iran a namkuatan ti Iran a balsen ti Israel.
Gapu iti daytoy, nagserra pay laeng dagiti kangrunaan nga eropuerto, ket saanda a nakapanaw iti Dubai.
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Cacdac, nangipaay iti kasapulan a tulong ti DMW kadagiti OFW babaen ti Migrant Workers Office (MWO) iti Dubai, agingga nga adda naglugananda nga agsubli iti Filipinas.
Agtultuloy ti panang-monitor ti DMW ken Department of Foreign Affairs (DFA) iti kasasaad iti Middle East tapno naan-anay ti panangsaranayda kadagiti mairaman nga OFW. (Aaron Recuenco/Manila Bulletin//Lito Hilidon/Bannawag)
